Թուրքերն այդպես էլ չկարողացան խոչընդոտել մեր տեղեկատվական հոսքերին. Սամվել Մարտիրոսյան

Մեդիափորձագետ Սամվել Մարտիրոսյանն այսօր լրագրողներին ասաց, որ Հայոց ցեղասպանության 100-ամյա տարելիցի միջոցառւմներին հայկական կողմը բավական լավ էր պատրաստվել՝ դիմակայելով թուրք-ադրբեջանական կիբերհարձակումներին: «Թուրքերը փաստացիորեն չկարողացան խոչընդոտել մեր տեղեկատվական հոսքերին: Մեր կողմի մասնագետները բավական լուրջ էին պատրաստվել: Ապրիլի 22-25-ն ընկած ժամանակահատվածում` թուրք-ադրբեջանական հաքերային հարձակումների ընթացքում, 250 կայք է կոտրվել, սակայն դրանցից ոչ բոլորն էին հայկական»,- ասաց նա:

Ինչ վերաբերում է զուտ ադրբեջանցի հաքերների գործողություններին, ապա, ըստ մասնագետի, նրանք մի քանի տասնյակ` ոչ այնքան նշանակալի կայքեր կոտրեցին: «DDOS հարձակումների մասին խոսելով` նկատենք, որ ամենալուրջ հարձակումը կատարվել է Հայոց ցեղասպանության 100-ամյա տարելիցի միջոցառումները համակարգող պաշտոնական կայքի վրա: Շատ դեպքերում էլ կայքեր կոտրելու մասին հայտարարությունները զուտ PR բնույթ էին կրում: Նշվում էր, որ իբրև թե կոտրվել են ՀՀ ՊՆ և ԱԳՆ կայքերը, սակայն, գոնե ես խափանման գործողություններ չտեսա, իսկ ահա հայտարարություններ այդ մասին շատ եղան»,- նշեց Մարտիրոսյանը:

Նրա բնորոշմամբ` այս անգամ առավելապես հայկական կողմից էին հաքերային հարձակումներ իրականացվում թուրքական կայքերի վրա: «Հայկական հաքերային խմբերն այս անգամ բավական ագրեսիվ էին գործում: Պետք է նշեմ, որ մեզ զուգահեռ բավական լուրջ էր աշխատում նաև մի սերբական հաքերային խումբ, որը պրոհայկական գործունեություն էր ծավալում: Միջազգային կայքերը ևս հայանպաստ դիրքերում էին, իսկ ահա թուրքական քարոզչությունը բավական ճգնաժամային վիճակում էր հայտնվել»,- հայտնեց մեդիափորձագետը:

Նա նշեց նաև, որ, ընդհանուր առմամբ, մենք համացանցում այլևս վիճելու խնդիր չունենք, այնինչ` մի քանի տարի առաջ խնդիր ունեինք ապացուցելու, որ 1915-ին Ցեղասպանություն է տեղի ունեցել: «Սառույցը կոտրվել է: Մենք այժմ միջազգային հանրությունից ավելի շատ պետք է ակնկալենք պատմական անվիճելի իրողության ճանաչում»,- ասաց Մարտիրոսյանը:

Նա տեղեկացրեց նաև, որ Google-ում «Որտե՞ղ է Հայաստանը», «Հայոց ցեղասպանություն» բանալի բառերով որոնումներն այս օրերին ավելացել են 2-4 անգամ:

Մեդիափորձագետի բնորոշմամբ`մեր տեղեկատվական համակարգը բավական լուրջ աշխատեց, և այս պարագայում հայկական տեղեկատվական հոսքը որևէ կերպ չխոչնդոտվեց թուրք հաքերների կողմից: Սամվել Մարտիրոսյանը նշեց, որ այս անգամ տուժողի կարգավիճակում էր հայտնվել հենց թուրքական կողմը: