Ամերիկահայ մոտոցիկլիստները 14-օրյա ճամփորդությունից հետո հասան Հայաստան

«Հայկական մոտոցիկլիստների ակումբ» (ARMENIAN BRIGADE) բարեգործական խմբի անդամները Հայոց ցեղասպանության զոհերի հիշատակը կհարգեն յուրովի. տղաները բաժանվել են երեք խմբի, որոնցից մեկն այս օրերին կլինի Հայաստանում, մյուս երկուսը` բողոքի ակցիաներ կանցկացնեն Վաշիգտոնում և Լոս Անջելեսում: Խմբի անդամները որոշել էին ԱՄՆ-ից Հայաստան գալ մոտոցիկլետներով: Այսօր նրանք արդեն ժամանել են Հայաստան:

Yerkir.am-ի հետ զրույցում Վահե Ղազարյանը նշեց, որ իրենք Լոս Անջելեսից մոտոցիկլետներն Իտալիա են ուղարկել օդանավով, որից հետո արդեն մոտոցիկլետներով երկար ճանապարհ են կտրել` Հայաստան հասնելու համար` Հունաստան, Բուլղարիա, Վրաստան:

«Երկու շաբաթ տևեց: Դժվար էր ճանապարհը, որովհետև չգիտես` ուր ես գնում, օտար է ամենը: Բայց, փառք Աստծո, բոլոր տեղերում էլ հայերը դիմավորում էին: Մեր երազանքն էր այնպիսի բան անել, որ ամբողջ աշխարհն իմանա Ցեղասպանության մասին: Կարծեմ` ինչ-որ բան հասցրինք»,- ասաց նա:

Ի դեպ, տղաներն արդեն բարձրացել են Ծիծեռնակաբերդ, սակայն ապրիլի 24-ին և 25-ին նույնպես փորձելու են գնալ այնտեղ: