Սրբադասման կարգին մասնակցողները չեն հասցնի մասնակցել Sisitem of down-ի համերգին

Այսօր մամուլի ասուլիս են հրավիրել Հայոց ցեղասպանության 100-րդ տարելիցի միջոցառումները համակարգող պետական հանձնաժողովի անդամները:

ՀՀ նախագահի աշխատակազմի ղեկավար Վիգեն Սարգսյանը նշեց, որ ապրիլի 23-ին`  օրվա երկրորդ կեսին, Մայր Աթոռ Սուրբ Էջմիածնում տեղի է ունենալու Հայոց ցեղասպանության նահատակների սրբադասման կարգ:

«Գիտեք, որ սրբադասումը բացառիկ երևույթ է: Հայ Առաքելական սուրբ եկեղեցին ունի սրբադասման կարգ, բայց երկար տարիների ընթացքում չի կատարվել սրբադասման կարգ: Այս սրբադասումը չափազանց կարևոր նշանակություն ունի նաև 100-րդ տարելիցի հոգևոր և բարոյական հենքը ձևավորելու, հիշողության հենքը ուժեղացնելու համար»,- ասաց Վիգեն Սարգսյանը:

Նա հավելեց, որ միջոցառումը բաց է բոլոր ցանկացողների համար, Երևանի քաղաքապետարանը կազմակերպելու է հանրային տրանսպորտ Երևանից դեպի Էջմիածին և վերադարձ Երևան:

«Մասնավոր մեքենաներով մենք հորդորում ենք չգնալ Էջմիածին, որովհետև դրանցով երթևեկելն ու կայանելը լինելու է խիստ սահմանափակ, որովհետև մեր համաքաղաքացիները, եթե անգամ մասնավոր մեքենաներով հասնեն Էջմիածին, շատ երկար ոտքով քայլելու խնդիր են ունենալու, հետևաբար, առաջարկում ենք ավելի շատ օգտվել այն տրանսպորտից, որը տրամադրելու է Երևանի քաղաքապետարանը»,- ասաց Վիգեն Սարգսյանը:

Նա նաև ուշադրություն հրավիրեց այն հանգամանքի վրա, որ այն քաղաքացիները, ովքեր կցանկանան այդ օրը Էջմիածնից վերադառնալ ու մասնակցել Հանրապետության հրապարակում կայանալիք` Sisitem of down խմբի համերգին, ապա չեն հասցնի մասնակցել այդ համերգին, քանի որ Էջմիածնում սրբադասման կարգի միջոցառումը կավարտվի 19:30-ին, իսկ Հանրապետության հրապարակում համերգը կսկսվի 20:30-ին: Բայց մուտքը հրապարակ թեև լինելու է  անվճար, բայց` խիստ սահմանափակ` միայն Շահումյան հրապարակում տեղադրված հատուկ դարպասներով, և 50 հազար մարդ հանրապետության հրապարակում հավաքվելուց հետո այդ մուտքը փակվելու է` անվտանգության խնդիրներից ելնելով:

«Հետևաբար, նրանք, ովքեր ցանկանալու են մասնակցել Հանրապետության հրապարակի միջոցառմանը, պետք է հնարավորինս շուտ գան: Հասկանալով, որ կա  Էջմիածնում սրբադասման արարողությանը հետեւելու ցանկություն, մենք Հանրապետության հրապարակում ուղիղ հեռարձակմամբ ցուցադրելու ենք սրբադասման կարգը»,- ասաց Վիգեն Սարգսյանը: