Մեկն ավելի շատ էր բռնաբարված, քան մյո՞ւսը. Սերգեյ Դանիելյան

Դերասան Սերգեյ Դանիելյանն այսօր լրագրողների հետ հանդիպման ընթացքում խոսեց Հայոց ցեղասպանության 100-րդ տարելիցին ընդառաջ իրականացվող միջոցառումների մասին: Դերասանի բնորոշմամբ՝ ինքը դեռ այսպիսի «ապրիլքսանչորսյան դիմավորում» չէր տեսել, որ նման մշակութային խանդավառությամբ ուղեկցվի:

«Այս խանդավառությունը վատ չէ, բայց երբ հիշում ես՝ ինչին ընդառաջ է այն արվում, մի քիչ վատ ես զգում, հետո հասկանում ես՝ սա նման է այն իրավիճակին, երբ, ասենք, տարիքով մարդ է մահանում, մի երկու բաժակ խմելուց հետո քեֆ է սկսվում քելեխի սեղանի շուրջ: Բայց երբ ազգովի են այդքան ուրախ, դա մի քիչ մտահոգիչ է»,- նշեց դերասանը:

Ըստ նրա` Ցեղասպանության միջոցառումների կազմակերպմանն ուղղված բոլոր մղումները շատ անկեղծ են, բայց մոտեցումն այդքան էլ լուրջ չէ, քանի որ դրա համար ձևավորված մշակույթ չկա: Որպես օրինակ` դերասանը նշեց Սերժ Սարգսյանի՝ Ցեղասպանություն տեսած կանանց ապրիլի 7-ի կապակցությամբ շնորհած մրցանակները: «Մրցանակը տրվում է, երբ ինչ-որ մրցույթ է, և այդտեղ հաղթում են, բայց ախր ի՞նչ մրցույթում պետք է հաղթեին կոտորած տեսած կանայք: Երևի թե մեկն ավելի շատ էր բռնաբարված, քան մյո՞ւսը, թե՞ մեկը մահացել էր՝ տանջանքների ենթարկվելով, իսկ մյուսը՝ ոչ: Սա նաև զավեշտալի է, բայց մղումներն անկեղծ են»,- ասաց Դանիելյանը: