Բողոքելով ՀՀ-ում Գերմանիայի դեսպանի արհամարհանքի դեմ ` ՀՅԴ երիտասարդները նստացույց են սկսել

Այսօր ՀՅԴ Հայաստանի Երիտասարդական և «Նիկոլ Աղբալյան» ուսանողական միությյունների անդամները ՀՅԴ «Սիմոն Վրացյան» կենտրոնից շարժվեցին դեպի Հայաստանում Գերմանիայի դեսպանատուն` պահանջելով ճանաչել և դատապարտել Ցեղասպանությունը:

Դաշնակցական երիտասարդները պատրաստվում էին դեսպանի միջոցով նամակ-պահանջագիր հանձնել Գերմանիայի Դաշնային կառավարությանը և Բունդեսթագին, սակայն դեսպանատան ոչ մի աշխատակից չիջավ` պահանջագիրը վերցնելու:

Դեսպանատան անվտանգության աշխատակիցը բողոքի ակցիայի մասնակիցներին տեղեկացրեց, որ դեսպանը խիստ ծանրաբեռնված է, իսկ ներկայացուցիչներից ոչ ոք չի ցանկանում իջնել: Նա առաջարկեց պահանջագիրը հանձնել իրեն, սակայն ակցիայի մասնակիցները հրաժարվեցին` պատճառաբանելով, որ արտաքին հաղորդակցության համար անվտանգության աշխատակիցը պատասխանատու չէ:

Ի դեպ, դեսպանատան անվտանգության աշխատակիցները yerkir.am-ի լրագրողին փորձում էին արգելել նկարահանել դեսպանատան շենքը` պատճառաբանելով, որ հնարավոր է` լրագրողը տեսանյութը տրամադրի ահաբեկիչների: Մեր այն հարցին, թե ի՞նչ իրավական հիմքով են արգելում, անվտանգության աշխատակիցներն այդպես էլ չկարողացան պատասխանել:

Այս պահին բողոքի ակցիան շարունակվում է: Դաշնակցական երիտասարդները նստացույց են սկսել: