Վիրավոր զինծառայողներից երկուսի վիճակը դեպի լավն է գնում

Տեղեկացրել էինք, որ Հայաստանի կենտրոնական կլինիկական զինվորական հոսպիտալ են տեղափոխվել մարտի 19-ին հակառակորդի հատուկ նշանակության ջոկատի ուժեղացված խմբի հարձակման հետևանքով վիրավորված զինծառայողներից երկուսը:

Yerkir.am-ի հետ զրույցում հոսպիտալի տնօրեն Արամ Ասատուրյանը հայտնեց, որ տղաների վիճակը միջին ծանրության է: «Երկուսն էլ հիմա գտնվում են հետվիրահատական շրջանում: Կարող եմ ասել` դեպի լավն են գնում»,- ասաց նա:

Ասատուրյանը տեղեկացրեց նաև, որ Մարտակերտի հոսպիտալում գտնվող վիրավոր զինծառայողի վիճակը շարունակում է մնալ նույնը` ծայրահեղ ծանր:

Հիշեցնենք, որ Էդգար Մարտիրոսյանը որովայնի վիրավորում ուներ /հաստ եւ բարակ աղիների վնասումով/ և վիրահատվել էր Մարտակերտի հոսպիտալում: Սպա Սարգիս Գաբրիելյանն ունի աջ վերին վերջույթի տրավմատիկ ամպուտացիա, ինչպես նաև բեկորային վնասվածքներ: