Ազգաբնակչության համար վտանգ ներկայացնող գայլերին չենք կարող չվնասազերծել. նախարար

Օրերս գայլերի հարձակման հերթական դեպքն էր գրանցվել Տավուշի մարզի Չիվա գյուղում. գայլերը հարձակվել էին 7 բնակիչների վրա՝ պատճառելով մարմնական վնասվածքներ:

Այսօր լրագրողները ՀՀ բնապահպանության նախարար Արամայիս Գրիգորյանին հարցրեցին, թե ի՞նչ քայլեր է նախարարությունը ձեռնարկում խնդիրը կարգավորելու համար, և արդյո՞ք նախարարությունում գործում է գայլերին ոչնչացնելու դեմ ուղղված ծրագիր:

«Ծրագիրը հիմա էլ է շարունակվում և կառավարության նիստով անցել է: Առաջիկայում կառավարության որոշում կլինի, որ նույն ձևով, ոնց որ նախորդ տարի, այս տարի նույնպես, նման գայլերի հետ կապված, որոնք հարակից անասնագլխաքանակի վրա կամ բնակչության համար խնդիրներ են առաջացնելու, որսը շարունակվի»,- ասաց նախարարը:

Հարցին, թե բնապահպանները պնդում են, որ գայլերին ոչնչացնելը սխալ քայլ է, և կարելի՞ է խնդիրն այլ տարբերակներով լուծել, նախարարը պատասխանեց. «Խնդիրը հետևյալն է` ամեն մարդի ունի կարծիք արտահայտելու իրավունք, մենք բոլորի կարծիքը հաշվի ենք առնում, բայց կա մասնագիտական լուրջ մոտեցում, և կա մասնագիտական առաջարկություն` այն գայլերը, որոնք իրենցից վտանգ են ներկայացնում ազգաբնակչության համար, մենք չենք կարող նրանց չվնասազերծել»: