Ես կատարվածը չեմ կարող դատապարտել, որովհետեւ տեղում չեմ եղել. Գալուստ Սահակյանը՝ Բերձորի դեպքի մասին

Այսօր ԱԺ նախագահ Գալուստ Սահակյանը, պատասխանելով լրագրողների հարցին, թե դատապարտո՞ւմ է Բերձորում կատարվածը, նշեց. «Գիտեք` ես կատարվածը չեմ կարող դատապարտել, որովհետեւ ես տեղում չեմ եղել»: Այնուհետև հավելեց. «Ես չեմ ընդունում պատերազմական գոտում որեւէ ակցիա: Երկրորդ` չեմ ընդունում, իհարկե, մեր պատգամավորներից մեկն «անբարոյականություն» անվանեց, ես ավելին կասեմ, որ որեւէ ակցիա կապվի ապրիլի 24-ի առումով, բայց եթե այդտեղ օրենքի խախտումներ են եղել, ինչ-որ մարդիկ խոշտանգվել են, կամ ինչ-որ ձեւով նրանց իրավունքները ոտնահարվել են, կարծում եմ` ես այն անձնավորությունն եմ, որ պիտի անընդհատ ինֆորմացիա ստանամ»:

Ինչ վերաբերում է ուժայինների գործողություններին, նաեւ այն հարցին, թե համաչա՞փ էին դրանք, պատասխանեց. «Ուժայինների գործողությունները դա ԼՂՀ խնդիրն է, եւ միշտ պետք է ընդունել, որ մենք Ղարաբաղը, այսպես ասեմ, որ ինքը իշխանական կառույցներ ունի եւ ունի իր նախագահը: Եվ զրուցել եմ նախագահի հետ` զուտ ինֆորմացիան ստանալու համար»:

Դիտարկմանը, որ ծեծվել են անգամ կանայք ու երեխաներ, Գ.Սահակյանն արձագանքեց, թե անգամ եթե Մոզամբիկում է տեղի ունենում, դարձյալ դատապարտում է: «Ես իրական փաստերը չգիտեմ եւ հանիրավի օդում չեմ կարող դատապարտել, բայց եթե ոտնձգություն է կատարվում որեւէ քաղաքացու նկատմամբ հանիրավի տեսքով, բնականաբար, դատապարտում եմ»,- ասաց նա: