Տագնապ` Թուրքիայում. ինչո՞ւ է հայ երիտասարդը օդանավակայանում գաղտնի տեսանկարահանում արել

Թուրքիայում տագնապ է առաջացել, երբ պոլսահայ լուսանկարիչ Ասպետ Մանուկյանը հեռակառավարման վահանակով սարքով տեսագրություն է արել Աթաթուրքի անվան օդանավակայանի տարածքում:

Ըստ Airporthaber-ի`երիտասարդը Թուրքիայի օդանավակայանի օդային տարածքում արած 12 րոպեանոց տեսագրությունը տեղադրել է Youtube-ում, որը մեծ աղմուկ է բարձրացրել՝ նրան մեղադրել են օդանավերի թռիչքները վտանգելու մեջ:

Կարճ ժամանակ անց Մանուկյանը տեսանյութը հեռացրել է համացանցից:

«Օդային սարքի վրա տեղադրված GPS համակարգը թույլ չի տալիս տեսագրություն անել օդանավակայաններում: Տեսագրող սարքն ինքնըստինքյան անջատվում է: Ես էլ դա փորձելու համար ցանկացա օդանավակայանի տարածքում տեսագրություն անել: Սպասեցի, որ GPS համակարգն անջատի, սակայն երբ չանջատվեց, շարունակեցի տեսագրել: Վատ նպատակ չեմ ունեցել»,- ասել է Մանուկյանը Airporthaber-ի հետ զրույցում:

Այդ կապակցությամբ իրենց բողոքն են հայտնել նաև մի շարք օդաչուներ:

Կայքը հայտնում է, որ, ըստ ավիացիայի կանոնների, օդանավակայանների տարածքում արգելվում է տեսագրությունը: Նույնիսկ առանց թույլատրության ցանկացած թռիչքի իրականացումը ենթակա է պատժամիջոցների կիրառման:

Կայքը նշում է նաև, որ բոլորին մտահոգում է, թե ինչ գործ կհարուցվի Ասպետ Մանուկյանի նկատմամբ:

Ստորև ներկայացնում ենք Ասպետ Մանուկյանի աղմկահարույց տեսագրությունը` արված Աթաթուրքի օդանավակայանի տարածքում: