Գյումրեցիները պահանջում են, որ իրենց պատասխանի Գևորգ Կոստանյանը

Հարյուրավոր գյումրեցիներ ներկա պահին հավաքված են Գյումրիում Շիրակի մարզի դատախազության շենքի մոտ ու բացականչում են` «Պահանջում ենք, պահանջում ենք», «Դուրս արի, դուրս արի»: Նրանք կանչում են ՀՀ գլխավոր դատախազին:

Քիչ առաջ ոստիկանի համազգեստով մեկը բարձրախոսով հայտարարեց, որ ՀՀ գլխավոր դատախազը խնդրում է, որ չխանգարեն, մի պահ լուռ լինեն, որ դուրս գա ու խոսի:

«Ասպարեզ» մամուլի ակումբի նախագահ Լևոն Բարսեղյանը կրկնեց, որ իրենց պահանջն այն է, որ կալանավորին ռուսական կողմը հանձնի հայկական կողմին, և որ նախաքննությունն ու հետագայում դատաքննությունն էլ կատարվեն հայկական իրավական համակարգի կողմից, իսկ ռուսական կողմը լինի օժանդակողի դերում միայն:

Քիչ առաջ Շիրակի մարզի դատախազ Րաֆֆի Ասլանյանը դուրս եկավ և առաջարկեց հարցը քննարկել 20-30 հոգանոց խմբով, սակայն հավաքվածները բոյկոտում են, սուլում և իրենց անհամաձայնությունը հայտնում առաջարկի վերաբերյալ, մանրադրամներ են նետում Րաֆֆի Ասլանյանի ուղղությամբ: Պահանջում են, որ դուրս գա գլխավոր դատախազը, և նրանից են ցանկանում պատասխան լսել:

«Եթե նա չունի պատասխան` թող դուրս գա, ասի, մենք 15 րոպեում պատասխանը կասենք: Իիսկ եթե պատասխան ունի, որը մեզ չի բավարարում, թող հետևի կողմից դուրս գա ու գնա, բայց մենք չենք թողնի, որ նա դուրս գա ու փախչի»,- ասաց Լ. Բարսեղյանը: