Քուաշի եղբայրները հայտարարել են, որ պատրաստ են զոհվել

Հունվարի 7-ին Փարիզում Charlie Hebdo խմբագրության վրա ահաբեկչական հարձակում իրականացրած կասկածյալներից  մեկը` Սաիդ Քուաշին, ժամանակին զբաղվել է կրոնի ուսումնասիրմամբ:  Այդ մասին հաղորդում է «ՌԻԱ Նովոստի»-ն:

Նա 2011-ին Եմեն է գնացել ու այնտեղ հանդիպել ԱՄՆ քաղաքացու հետ, ով «Անվարոմ ալ Ավլակի»-ի ահաբեկիչներից էր և ավելի ուշ սպանվել է ԱՄՆ-ի հատուկ ծառայությունների  կողմից:

«Ֆրանս-պրեսս»-ը հաղորդում է, որ Եմենի հետախուզությունը ներկայացնող  բարձրաստիճան մի պաշտոնյա, որի անունը չի նշվում, նշել է, որ Սաիդ Քուաշը ժամանել էր Եմեն կրոնը ուսումնասիրելու նպատակով: Աղբյուրը չի հստակեցրել` արդյո՞ք նա սովորել է միջազգային ահաբեկչական «Ալ Քաիդա» ցանցի եմենյան ճամբարում, թե՞ ոչ:

Ահաբեկչության օրը Քուաշի եղբայրները անցորդներին են դիմել, որ վերջիններս լրատվամիջոցներին հաղորդեն այն մասին, որ իրենք «Եմենում ալ Քաիդա» խմբավորման անդամներ են:

«Ալ Քաիդա» խմբավորման ղեկավար Ուսամա Բեն Լադենի սպանությունից հետո  փորձագետները չէին բացառում, որ «Ալ Ավլակի» խմբավորումն է զբաղեցնելու նրա տեղը:

«Ալ Քաիդա»-ի եմենյան բջիջը հայտնի է «Արաբական թերակղզու  ալ Քաիդա» անվամբ: Այն աշխարհում ամենաակտիվ խմբավորումներից մեկն է:

Քուաշի եղբայրները հայտարարել են, որ պատրաստ են  ընդունել իրենց զոհվելու փաստը: Այդ մասին հայտարարել է Ֆրանսիայի Սեն նահանգի պատգամավոր Իվ Ալբարելլոն` ասելով, որ այդ հայտարարությունը հնչել է այն երկխոսության ժամանակ, որը իրականացրել են Ֆրանսիայի իրավապահ մարմինները ահաբեկիչների հետ կապ հաստատելու փուլում: