Արտեմ Ասատրյանը մերժել է իր ընկերոջ խնդրանքը

Այսօր ՀՀ աշխատանքի և սոցիալական հարցերի նախարար Արտեմ Ասատրյանը ամփոփել է 2014 թվականին սոցիալական ոլորտում տեղի ունեցած իրադարձությունները, բարեփոխումների ընթացքը, ինչպես նաև 2015 թվականի համար նախատեսված ծրագրերը:

Նախարարի խոսքերով` 2014 թվականը կարելի է համարել ամենաբեկումնային տարին սոցիալական համակարգերի ստեղծման, և ամենաբարդ տարին՝ բարեփոխումների իրականացման առումով: 2014-ը սոցիալական ոլորտի տարբեր ճյուղերում բարեփոխումների մեկնարկի տարի էր, որոնք անխուսափելիորեն ուղեկցվեցին լարված բանավեճերով, բազմաբնույթ առաջարկներով և անհրաժեշտ հրատապ փոփոխություններով:

 Նախարարը բնութագրեց տարին նաև որպես սոցիալական երկխոսության տարի, քանի որ իրականացվող բարեփոխումները, մասնավորապես` կուտակային կենսաթոշակային համակարգը,  առնչվում էին մեծաթիվ քաղաքացիների, սակայն չկար այդ բարեփոխումների միանշանակ ընկալումը նրանց կողմից:

«Որոշակի դժգոհություն եղավ, բայց մեզ հաջողվեց  կուտակային կենսաթոշակային համակարգը ընկալելի դարձնել հանրության համար»,- ասաց Արտեմ Ասատրյանը` հավելելով, որ հաշվի է առնվել հանրային պահանջը, և բաց քննարկումների արդյունքում հնարավոր եղավ գտնել համապատասխան լուծումներ:

Լրագրողների այն հարցին, թե ներկայումս որքա՞ն մարդ է ներգրավված կուտակային կենսաթոշակային համակարգում, նախարարը պատասխանեց, որ համակարգում է մոտ 100 հազար մարդ:

Արտեմ Ասատրյանը կարևոր ձեռքբերում է համարում սոցիալական պաշտպանության ոլորտում սուբյեկտիվիզմի գործոնը նվազեցնելը: Պատմեց, որ իր արվեստագետ ընկերներից մեկը խնդրել է լուծել իր քրոջ թոշակի հետ կապված ինչ-ինչ հարցեր, սակայն նախարարը մերժել է, և նրա ընկերը դրան ըմբռնումով է մոտեցել,  որովհետև, Արտեմ Ասատրյանի  խոսքով, նույնիսկ նախարարն իրավունք չունի հայեցողական որոշումներ կայացնելու, եթե դրանք նախատեսված չեն օրենքներով: