Արտեմ Ասատրյանը խոսեց «Ժամանակավոր անաշխատունակության նպաստների մասին» օրենքում փոփոխություններ անելու օրինագծի մասին

ԱԺ-ում կառավարության հետ հարցուպատասխանի ժամանակ ԱԺ ՀՀԿ խմբակցության պատգամավոր Ռուզաննա Մուրադյանը աշխատանքի եւ սոցիալական հարցերի նախարար Արտեմ Ասատրյանին «Ժամանակավոր անաշխատունակության նպաստների մասին» ՀՀ օրենքում փոփոխություններ անելու օրինագծի վերաբերյալ հարց հնչեցրեց:

Արտեմ Ասատրյանը ասաց, որ վերջին չորս-հինգ տարիների ընթացքում պետական բյուջեով նախատեսված երկու նպաստների համար` հիվանդության ու հղիության, ծննդաբերության նպաստ, հատկացվող գումարները ավելացել են երեք անգամ: Եվ երբ վերանայել են սոցիալական ծրագրերի արդյունավետության հարցը, այդ ծրագրերի վրա ազդեցություն են թողել այնպիսի չափանիշներ, ինչպիսիք են ծնելիությունը, աշխատավարձի չափը, հիվանդացությունը:

Այդ գործոնները վերջին տարիներին չեն ավելացել երեք անգամ, ահա` ինչու, հաշվի առնելով խնդիրները, ՎՊ հաշվետվությունը, մշակվել է օրենսդրական նախաձեռնություն, որն այս պահին գտնվում է ԱԺ-ում:

Նախարարը նշեց, որ նախարարությունն ակնկալում է առաջարկություններ լսել հասարակական կազմակերպություններից, պատգամավորներից, որպեսզի այս ընթացքում ուսումնասիրվեն այդ առաջարկությունները և ներկայացվեն ԱԺ դատին: