Արտեմ Ասատրյանը մտավախություն չունի` կուտակային նոր օրենքի սահմանադրականության հետ կապված

ՀՀ սոցիալական հարցերի և աշխատանքի նախարար Արտեմ Ասատրյանը, այսօր պատասխանելով լրագրողների այն հարցին` ինչպե՞ս է վերաբերվում այն փաստին, որ ՀՅԴ-ն և ԲՀԿ-ն ցանկանում են կուտակային նոր օրենքի սահմանադրականությունը կրկին վիճարկել ՍԴ-ում, պատասխանեց. «Դա իրենց գործն է»:

Նախարարը մտավախություն չունի, որ նոր օրենքի կետերը կարող են հակասահմանադրական ճանաչվել, որովհետև, ըստ նրա, ՍԴ բոլոր դիրքորոշումները, նախորդ օրենքի հետ կապված, հաշվի են առնվել: Դիտարկմանը, որ նախորդ օրենքը հակասահմանադրական ճանաչվեց, մինչդեռ ՀՀ նախագահը հայտարարում էր, որ կողմ է այդ օրենքին, նախարարը պատասխանեց, որ դիտարկումը կոռեկտ չէ, ասա ասաց. «Ցանկացած օրենք սահմանադրական է, քանի դեռ ՍԴ-ն չի ճանաչել դրա հակասահմանադրականությունը»:

Ի դեպ, նախարարը հերքեց մամուլում տարածված այն տեղեկատվությունը, թե իբր սոցիալական հարցերի նախարարությունում լուրջ չարաշահումներ են հայտնաբերվել: