Արտեմ Ասատրյանը համակարգը լցրել է հարազատներով

«Ժողովուրդ»-ի լավատեղյակ աղբյուրները փոխանցում են, որ ՀՀ աշխատանքի և սոցիալական հարցերի նախարար Արտեմ Ասատրյանը նախարար նշանակվելուց հետո համակարգը լցրել է հարազատներով:

Թերթը տեղեկացել է, որ Ասատրյանի աները՝ Լևոն Պետրոսյանը, աշխատանքի և սոցիալական հարցերի սոցիալական հետազոտությունների ազգային ինստիտուտի աշխատանքի և զբաղվածության բաժնի պետի պաշտոնն է զբաղեցնում: Պետրոսյանը, իր թիկունքն ամուր համարելով, բավական կոշտ մեթոդներով է աշխատում՝ հարուցելով աշխատակազմի դժզոհությունը: Արտեմ Ասատրյանի կնոջ քույրը՝ Պերճուհի Պետրոսյանն էլ կենսաթոշակային համակարգի իրազեկման և հանրային իրազեկման կենտրոնում է աշխատում:

«Ինչո՞ւ եք Ձեզ շրջապատել բարեկամներով»,- «Ժողովուրդ» օրաթերթի այս հարցից ՀՀ աշխատանքի և սոցիալական հարցերի նախարար Արտեմ Ասատրյանը մի պահ շփոթվել, այնուհետև պատասխանել է. «Իրականում նման բան չկա»: Մինչդեռ փաստերն այլ իրողության մասին են վկայում, նշում է թերթը: