Արտեմ Ասատրյանը այդպես էլ չպատասխանեց տրված հարցին. ՍԴ նիստ

Այդ ի՞նչ հատուկ վերաբերմունք է գործատուների հանդեպ. կենսաթոշակային նոր համակարգի միջոցով գործատուների հարկային բեռը մոտ 10 տոկոսով նվազում է, իսկ աշխատողներինը` ավելանում: Սահմանադրական դատարանի նախագահ Գագիկ Հարությունյանն այս հարցն ուղղեց աշխատանքի և սոցիալական ապահովության հարցերի նախարար Արտեմ Ասատրյանին` «Կուտակային կենսաթոշակների մասին» օրենքի` ՍԴ-ում քննության ժամանակ:

Արտեմ Ասատրյանը բուն հարցին պատասխանելու փոխարեն, բավական երկար բացատրում էր, թե որ թվականին է ներդրվել, փոփոխվել սոցիալական ապահովության վճարների համակարգը: Նշեց նաև, որ, 2013 թվականից սկսած, սոցիալական ապահովության վճարն ու եկամտահարկը միացվեցին, քանի որ միևնույն գումարից պահվող վճարներ էին դրանք:

Գ. Հարությունյանը հարցը կրկին տվեց` այո, տեխնիական առումով հարցը լուծվեց, սակայն ինչո՞ւ է թեթևացվել գործատուի ֆինանսական բեռը, և սա այն դեպքում, որ մի շարք եվրոպական երկրներում այդ հարկը մինչև 40 տոկոս է սահմանված:

Ա. Ասատրյանը նշեց, որ գործատուի վրա պարտավորություն կա դրված, որ գործատուն ավելի պակաս չպետք է վճարի աշխատողին, քան նախկինում: Սակայն այդպես էլ բուն հարցին պատասխան չհնչեց: