Դինքի սպանությունը պատահական չէր. Դավութօղլու

«Ակօս» թերթի խմբագիր Հրանտ Դինքի սպանության գործով Թուրքիայի բարձրաստիճան պաշտոնյաները շարունակում են ցուցմունքներ տալ:

Երկրի վարչապետ Ահմեդ Դավութօղլուն այդ կապակցությամբ մի շարք հայտարարություններ է արել Haberturk-ի հետ զրույցում:

Նշելով, որ Դինքի հետ ծանոթացել է ակադեմիական կյանքի ընթացքում, Դավութօղլուն ասել է. «Նրան սիրում, հարգում էի: Շատ համաժողովների միասին ենք մասնակցել: Նրա սպանությունը պատահական չէ: Երբեք չեմ մոռանա այդ օրը: Երբ լուրն ստացա, շատ նեղվեցի: Այդ ժամանակ (2007թ.-ին) Աբդուլլահ Գյուլը արտաքին գործերի նախարարն էր, զանգահարեցի նրան և խնդրեցի, որ մեր դեսապաններն անձամբ ամբողջ սփյուռքին Ստամբուլ հրավիրեն` հուղարկավորությանը մասնակցելու: Եկածները թվում կային այնպիսի մարդիկ, ովքեր խիստ դեմ էին մեզ: Նրանց հետ գաղտնի հանդիպումներ ունեցա, և նրանք ինձ ասացին` չգիտեինք Թուրքիայի` այսպիսին լինելու մասին: Երկու ժողովուրդների` Հրանտ Դինքին տեր կանգնելն ու այս պետության հրավերը նրանց զարմացրեց: Մենք պետք է կոտրենք այս տաբուները»:

Հարցին, թե հնարավո՞ր է հանդիպի Հրանտ Դինքի ընտանիքի հետ, Դավութօղլուն պատասխանել է` հնարավոր է:

«Ես, օրինակ, Մահչուպփյանին ոչ թե նրա ինքնության, այլ նրան վստահելով եմ իմ գլխավոր խորհրդական նշանակել: Հանրապետության պատմության մեջ առաջին դեպքն է, որ մեր հայ քաղաքացին նման կարևոր պաշտոն է ստանում: Ինչպես նշեցի, սա կապված է նրա` ինտելեկտուալ անձնավորություն լինելու հետ»,- ասել է Դավութօղլուն: