Թուրքիայի ԶՈՒ գլխավոր շտաբի կայքից անհետացել է Ցեղասպանությունը հերքող աշխատությունը

Մինչ Թուրքիային 2015 թվականի ապրիլի 24-ին ընդառաջ դժվար օրեր են սպասվում, երկրի ԶՈՒ գլխավոր շտաբը տարօրինակ քայլ է ձեռնարկել: Այդ մասին հայտնում է Cumhuriyet-ը:

Թուրքիայի ԶՈՒ գլխավոր շտաբի պաշտոնական կայքի «Պատմության պատառիկներ» բաժնից հանվել է «Հայերի գործունեությունը 1914-1918 թվականներին» ենթաբաժինը:

«Հայոց ցեղասպանության պնդումներին» հակադարձելու համար նախատեսված 8 հատորանոց փաստաթուղթը պատրաստված էր ԶՈՒ գլխավոր շտաբի Զինվորական պատմության և ռազմավարական հետազոտությունների կենտրոնի կողմից, որը կայքում տեղակայված էր PDF ձևաչափով: Դրանում, բացի Օսմանյան կայսրության ժամանակվա արխիվներից, տեղ էին գտել նաև ռուսական արխիվներից ձեռք բերված տեղեկություններ: Թուրքերենով և անգլերենով հետազոտողների դատին հանձնված այդ աշխատության վրա մասնագետներն աշխատել էին 2006-2008 թվականներին:

1914-1918 թվականներին 1047 փաստաթուղթ ուսումնասիրելուց հետո արդի թուրքերենով և անգլերենով ներկայացված աշխատությունն այժմ հասանելի չէ կայքում:

Կայքը հիշեցրել է նաև, որ Հայաստանն ու հայկական սփյուռքը շարունակում են 100-ամյա տարելիցին ուղղված նախապատրաստական աշխատանքները, և շեշտել է, որ Հայաստանի Հանրապետության նախագահ Սերժ Սարգսյանը, ով Թուրքիայի նախագահական ընտրություններից առաջ երկրի ապագա նախագահին հրավիրել էր Հայաստան՝ մասնակցելու Ցեղասպանության 100-ամյա տարելիցի միջոցառումներին, պատասխանի է սպասում: