Ադրբեջանում կալանավորված իրավապաշտպանը լուրջ առողջական խնդիրներ ունի

Կալանավորված ադրբեջանցի իրավապաշտպան Ինթիգամ Ալիևի բժշկական հետազոտության արդյունքները մի շարք հիվանդությունների մասին են վկայում. գրում է contact.az-ը:

Նրա դուստրը՝ Նարմին Կամիլսոյը, Facebook-ի իր էջում  գրել է, որ իրավապաշտպանի մոտ հայտնաբերվել է պարանոցային օստեոխոնդրոզ և միջողային սկավառակի պրոտրուզիա: Այնուամենայնիվ, նրան նշանակվել է ընդամենը ամբուլատոր բուժում կալանավայրի պայմաններում: Ալիևն ուժեղ գլխացավեր ունի, որոնց պատճառը նյարդային համակարգի խախտումներն են և հոգեբանական լարվածությունը: Նրա բանտախցում ցուրտ է (ջեռուցում կլինի միայն նոյեմբերի 15-ին), և նա հաճախ հիվանդանում է:

Ինթիգամ Ալիևը ձերբակալվել է օգոստոսի 8-ին՝ հարկերից խուսափելու, լիազորությունները չարաշահելու և անօրինական ձեռնարկատիրությամբ զբաղվելու մեղադրանքով: Նա իր մեղքը չի ընդունում, իսկ Amnesty İnternational-ի կողմից քաղբանտարկյալ է ճանաչվել: