Թուրքիայում Հայոց ցեղասպանության մասին ստեր հորինողներն արդեն իրենք են հավատում իրենց ստերին

Հայոց ցեղասպանության մասին «Հատումը» ֆիլմով թուրքերի «վերքին աղ լցրած» և արդյունքում սուր քննադատությունների արժանացած`  թուրքական ծագումով գերամանացի ռեժիսոր Ֆաթիհ Աքընը իր այդ ֆիլմը նոյեմբերին կցուցադրի Թուրքիայում:

Թուրքական հիստերիան այնքան է ուժեղացել, որ Haberler-ը, փորձելով վատաբանել ֆիլմը, գրել է. «Իբրև թե ռեժիսոր Ֆաթիհ Աքընի՝ Թուրքիային դավաճանող ստերով, զրպարտություններով  հարուստ ֆիլմը բացասական մեծ արձագանք է գտել»:

Ներկայացնելով ֆիլմի սցենարը` թուրքական կայքը գրել է. «Զարմանալին այն է, որ Գերմանիայի արխիվների և հետազոտությունների օժանդակությամբ պետական հեռուստաալիք ZDF-ն ֆիլմի գովազդի հարցում մեծ աջակցություն է ցուցաբերել: Մինչ ZDF-ն կրակի վրա բենզին է լցնում, ռեժիսորը, անդրադառնալով Հրանտ Դինքի սպանությանն ու հրեական ծագումով սադրիչ` գրող Օրհան Փամուքին, փորձում է ցույց տալ, որ Թուրքիայում քրիստոնյաների դեմ բռնություններ և սպանություններ են իրականացվում»:

Թուրքիայում, փաստորեն, արդեն սկսել են ոչ միայն Հայոց ցեղասպանության մասին խոսելիս կիրառել «իբրև թե» բառը, այլ նաև բոլոր այն անձանց կամ երևույթների դեպքում, որոնք ինչ-որ կերպ առնչվում են Հայոց ցեղասպանությանը: Թուրքական ոճի համաձայն՝ այս կայքում ևս հնչում են միմիայն անհիմն ու սուտ մեղադրանքներ՝ ուղղված հայկական կողմին:

Ըստ երևույթին՝ թուրքական հերքողական քաղաքականությունը 100 տարիների ընթացքում այնքան է արմատացել հասարակության գիտակցության մեջ, որին, բացի ժողովրդից, հավատում են նաեւ իրենք՝ հորինողները: