«Նաիրիտ»-ի նախկին տնօրենը հարթ հարաբերություններ չի ունեցել Երվանդ Զախարյանի հետ. «Հրապարակ»

«Նաիրիտ» ՓԲԸ նախկին տնօրեն Հովհաննես Հախինյանը, որին սեպտեմբերի 8-ին անսպասելի ազատեցին աշխատանքից, այս օրերին դեռ պատրաստ չէ խոսել իր պաշտոնանկության մասին: Գործարանի աշխատակիցները պատմում են, որ ձեռնարկության խորհրդի նիստի որոշումը այդ ազատման վերաբերյալ Հախինյանի համար ևս անակնկալ է եղել:

Նիստի ժամանակ ստանալով իր ազատման մասին լուրը՝ նա նույնիսկ մի քանի կտրուկ արտահայտություններ է արել՝ ուղղված էներգետիկայի փոխնախարար Արա Սիմոնյանին, ասելով մոտավորապես հետևյալը.

«Դո՞ւք եք ինձ ընդունել աշխատանքի, որ ազատում եք»: Ըստ շրջանառվող լուրերի, Հախինյանի «ջրերը» Երվանդ Զախարյանի հետ «մի առվով չեն գնացել»: Նրա պաշտոնանկության հարցում դեր են կատարել նաև գործարանի ներքին ինտրիգները, նրա և արտադրության գծով տնօրեն Ռուբեն Սաղաթելյանի միջև գոյություն ունեցող հակասություններն ու լարվածությունը: Գործարանի աշխատակազմում նրանցից յուրաքանչյուրն իր թիմն ուներ: Ռուբեն Սաղաթելյանին ի վերջո հաջողվեց հաղթել շեֆին և իր ձեռքը վերցնել չաշխատող գործարանի ղեկը:

Հովհաննես Հախինյանը հայտնի էր որպես Վահան Մելքոնյանի դրածո, մարդ, որն իր «վիզը դրեց» չաշխատող գործարանի լծի տակ, սակայն չունեցավ տնօրենի հատկություններ: Կոլեկտիվի անդամները նշում են նրա բազմամյա վաստակը, բայց նաև հիշում են, որ նա ահուսարսափի մեջ էր պահում կոլեկտիվին, ումից մի փոքր դժգոհություն էր լսում, անմիջապես արագ կրճատման տակ էր գցում:

Մարդիկ մեզ պատմում էին, որ Հախինյանը հաճախ էր մերժում ծանր առողջական վիճակում հայտնված աշխատողներին՝ վերակենդանացման բաժնում գտնվող կամ քաղցկեղով հիվանդ, երբ վերջիններս անձամբ կամ հարազատների միջոցով օգնություն էին խնդրում՝ բուժման ծախսերը հոգալու համար»,– գրում է «Հրապարակ» թերթը։

Մանրամասները՝ թերթի այսօրվա համարում։