Ֆոլկի համար չկա սահման

«Ավանդական տոների վերածնունդ» կրթամշակութային հասարակական կազմակերպությունը սեպտեմբերի 11-15-ը կանցկացնի «Հայաստանը խաղաղության խաչմերուկում» միջազգային երրորդ ֆոլկլորային փառատոնը, որին կմասնակցեն ավանդական երգի-պարի և նվագարանային երաժշտության խմբեր Հայաստանից և Լեհաստանից:

Երևանից կմասնակցեն «Տոնացույց», «Տարոնցիներ», «Ակունք», «Սասուն», «Մասունք», «Հարց հայոց» համույթները, Բյուրականից՝ «Կաթնաղբրիկ» և «Խնդում», Ուջանից՝ «Կարոտ», Ներքին Բազմաբերդից «Գորանի» խմբերը, Սասունիկի և Աշնակի ազգագրական համույթները, Աշտարակի Ն. Սիսակյանի, Բյուրականի Հովհ. Թումանյանի անվան և Անտառուտի միջնակարգ դպրոցների սաները: Լեհաստանից կմասնակցեն «Վիելկոպոլանիե» և «Սզամոտուլի» խմբերը:

Փառատոնի բացման արարողությունը տեղի կունենա այսօր` ժամը 17-ին, Բյուրականի մշակույթի տանը, եզրափակիչ համերգը՝ սեպտեմբերի 15-ին` ժամը 17-ին, Ուջանում: Փառատոնի շրջանակում տեղի կունենան մի շարք միջոցառումներ` համերգներ, երթեր, ցուցահանդեսներ և ճանաչողական էքսկուրսիաներ Երևանում, Էջմիածնում, Աշտարակում, Բյուրականում, Ամբերդում, Գառնիում, Գեղարդում, Ուջանում և այլ վայրերում:

Նախատեսվում են հանդիպումներ ուսանողների հետ՝ «Խաղաղության մշակույթ» թեմայով և մշակութային փոխանակությունների այլ ծրագրեր: «Հայաստանը խաղաղության խաչմերուկում» փառատոնի իրականացումը նպաստում է գյուղական համայնքների մշակութային կյանքի աշխուժացմանը և մշակույթի հանրահռչակմանը: