Ադրբեջանը մայրուղի կկառուցի դեպի Հայաստանի հետ սահման՝ հետագայում Նախիջևանի հետ կապվելու համար

Ադրբեջանը նախատեսում է մայրուղի կառուցել դեպի Հայաստանի սահման՝ իր վերահսկողության տակ անցած Ղարաբաղի տարածքով: Այս մասին երկուշաբթի հայտարարել է երկրի մայրուղիների պետական գործակալության մամուլի ծառայության ղեկավար Անար Նաջաֆլին:

«Նոր ճանապարհը Հորադիզ – Մինջիվան (Միջնավան՝ խմբ.) մայրուղին է՝ Հայաստանի հետ սահմանին»,- ասել է նա ադրբեջանական Trend լրատվական գործակալությանը տված հարցազրույցում՝ հավելելով, որ նախագծման աշխատանքներն արդեն սկսվել են:

Նաջաֆլին նաև նշել է, որ ապագայում այս մայրուղին կարող է երկարացվել դեպի Նախիջևան:

Ավելի վաղ Ադրբեջանում սկսվել էր Բաքվի վերահսկողության տակ գտնվող Ֆիզուլիի շրջանից դեպի Շուշի մայրուղու շինարարությունը: Դրա երկարությունը կկազմի 101,5 կմ: