Արվեստի 2-րդ ամառային ակադեմիայի հաղթողները կորոշվեն օգոստոսի 29-ին

Ծաղկաձորի գրողների միության ստեղծագործական տանն ավարտվեց Արվեստի 2-րդ ամառային ակադեմիան` երիտասարդ գրողների, կոմպոզիտորների, նկարիչների և թարգմանիչների համար:

20 երիտասարդ ստեղծագործողներ 4 օրվա ընթացքում հնարավորություն ստացան մասնակցելու վարպետության դասերի, որոնք վարում էին Արամ Պաչյանը (գրականություն), Արթուր Ավանեսովը, Արամ Հովհաննիսյանը (կոմպոզիցիա), Կարեն Բարսեղյանը, Հրաչ Վարդանյանը (կերպարվեստ), Զավեն Բոյաջյանը և Անահիտ Ավետիսյանը (թարգմանություն): Թեև դասերը անցկացվում էին զուգահեռ, մասնակիցները հնարավորություն ստացան միասին համատեղ միջոցառումներ, երաժշտության լսումներ, ընթերցումներ, քննարկումներ կազմակերպելու:

Երիտասարդ ստեղծագործողները քննարկեցին արվեստի տարբեր ճյուղերին վերաբերող արդիական հարցեր, իսկ հետո դասախոսների օգնությամբ կազմակերպեցին համատեղ ներկայացում:

Ակադեմիայի ընթացքում ստեղծված բոլոր գործերը կներկայացվեն օգոստոսի 29-ին «Նարեկացի» արվեստի միությունում կայանալիք համերգ-ցուցահանդեսի ժամանակ: Հանդիստատեսը փակ քվեարկությամբ յուրաքանչյուր ոլորտից կընտրի լավագույն ստեղծագործությունը: