Հայաստանը շահագրգիռ է ԵՏՄ անդամակցման գործընթացի սառեցմամբ. ռուս խմբագրի ուշագրավ հայտարարությունը

Ինչպես հաղորդում է ԳԱԼԱ-ն. «Երեկ ռուսական REX տեղեկատվական գործակալությունն ինֆորմացիա էր հրապարակել՝ համաձայն որի, Երևանում նախապատրաստվում է ՀՀ կառավարության ղեկավար Հովիկ Աբրահամյանի պաշտոնանկությունը:

Վարչապետի պաշտոնանկության գլխավոր պատճառ էր նշվում Հայաստանի արտաքին տնտեսական հարաբերությունների վերաձևավորման անհրաժեշտությունը, որի զարգացման հարցում, ինչպես կարծիք կա, Հովիկ Աբրահամյանը չի կարողացել հաջողության հասնել, հատկապես Հայաստանի` Եվրասիական տնտեսական ինտեգրման ծրագրի համատեքստում:

Գործակալության գլխավոր խմբագիր Մոդեստ Կոլերովը ԳԱԼԱ-ի հետ զրույցում տարածված տեղեկատվությունն ու այն հարցը, թե արդյո՞ք սա իր տեսակի մեջ ճնշում է Կրեմլի կողմից՝ մեկնաբանեց. «Ինֆորմացիայի աղբյուրը բավականին լուրջ է, որպեսզի այդ ինֆորմացիան համարենք իբրեւ սովորական ճնշում գործադրելու փորձ: Եվ առհասարակ բոլոր, այսպես կոչված «Կրեմլից եկող ճնշումները», որոնք հայաստանյան ԶԼՄ դաշտում շրջանառվում են, բոլորն էլ մտացածին են՝ չկա որևէ փաստ»:

Տեղեկատվական գործակալության գլխավոր խմբագիրը տեսակետ հայտնեց, թե Հայաստանին հիմա այլ բան է հետաքրքրում. «Պետք է հասկանալ.  Հայաստանը հիմա  առավել շահագրգիռ  է ԵՏՄ անդամակցման գործընթացի սառեցմամբ, որովհետև Ռուսաստանը ԵՄ-ի և ԱՄՆ-ի կողմից կիրառված պատժամիջոցների տակ է ընկել: Այնպես որ ճնշում գործադրելու որևէ բան չկա և իմաստ էլ չկա»:

Ամփոփելով խոսքը REX տեղեկատվական գործակալության խմբագիր Մոդեստ Կոլերովը նշեց. «Ըստ իս, այս պաշտոնանկության  հարցի պատճառը ներքին է, հենց իրենք՝ Հայաստանի իշխանությունները,  ճանապարհ են փնտրում վերականգնելու բազմավեկտոր քաղաքականությունը»: