Ընդունելության քննությունների օբյեկտիվության ու արդարության ցուցանիշներն ավելի բարձր են. Արմեն Աշոտյան

Այսօր կառավարության նիստից հետո ԿԳ նախարար Արմեն Աշոտյանն ասաց, որ այս տարվա ընդունելության քննություններն ավելի լավն էին, քան անցյալ տարվա քննությունները, և ավելի վատը կլինեն, քան հաջորդ տարվա քննությունները: Ըստ նախարարի` վերջին տարիներին նախարարության որդեգրած քաղաքականությունն ամբողջովին արդարացված է, ինչի մասին վկայում է հասարակական աժիոտաժի բացակայությունը:

«Նախկինի ու այսօրվա միջև տարբերությունը հսկայական է, այսօր օբյեկտիվության և արդարություն ցուցանիշներն ավելի բարձր են»,- ասաց Արմեն Աշոտյանը:

Նրա խոսքով` Հայաստանում ընտրություններն ու ընդունելության քննությունները միշտ ուղեկցվում են հանրային գերուշադրությամբ: «Քննություններն արդեն այդ ցանկից կարող եք հանել: Ասեմ ավելին՝ ես եմ փորձել այս ընթացքում գուցե ամառվա տապից հոգնած, բեզարած լրագրողների ուշադրությունը հրավիրել ընդունելության քննությունների վրա: Եթե նախկինում ես գնում էի կենտրոն, և լրագրողական թիմը երբեմն ավելի շատ էր լինում, քան ծնողականը, ապա այս տարի ուրախանում էի, որ լրագրող էի տեսնում, ասում էի` գոնե ձեզ մի քիչ հետաքրքրել է»,- նշեց նախարարը: