«Մատյան ողբերգության»-ը` Վիտալի Մանսկու «Գիրքը» ֆիլմի ոգեշնչման աղբյուր

Այսօր «Ոսկե ծիրան» կինոփառատոնի շրջանակներում տեղի կունենա Վիտալի Մանսկու «Գիրքը» ֆիլմի պրեմիերան: Վիտալի Մանսկին և Մեսրոպ քահանա Արամյանը լրագրողների հետ հանդիպման ժամանակ ներկայացրեցին իրենց ֆիլմը, որի ոգեշնչման աղբյուրը եղել է Գրիգոր Նարեկացու «Մատյան ողբերգության» գիրքը:

«Հայերը հպարտանում են Նարեկացիով, և թեեւ ոգեշնչվել ենք Գրիգոր Նարեկացու գրքով, ֆիլմը նրա մասին չէ: Ստեղծագործությունը ժամանակակից մարդու մասին է, ով չի մտածում կյանքի իմաստի մասին»,- ասաց ֆիլմի ռեժիսոր Վիտալի Մանսկին:

Ֆիլմի համահեղինակ և նախաձեռնության հեղինակ Մեսրոպ քահանա Արամյանի կարծիքով` մարդկային կյանքը ևս գիրք է, որը մենք փորձում ենք կարդալ Նարեկացու «Մատյան ողբերգության»-ի` այդ հավերժական հայելու մեջ: Ֆիլմի ավարտը նույնպես նման փակում ունի: Քահանա Արամյանի հավաստմամբ` ֆիլմում երևում է գրեթե ամբողջ աշխարհը` Ավստրալիայից մինչև Արգենտինա:

Ֆիլմի պրեմիերան կայացել է Մոսկվայի կինոփառատոներից մեկի ժամանակ, այն նախատեսվում է ցուցադրել ամբողջ աշխարհում: