Դատարանի հանդեպ դժգոհությունը անտեղի է` անմեղսունակ հանցագործի մասով. Արսեն Բաբայան

Դանակի 13 հարվածով մարդ սպանած, իսկ հետագայում անմեղսունակ ճանաչված անձի վերաբերյալ դատավճիռին Yerkir.am-ը անդրադարձել էր օրեր առաջ: Կենտրոն և Նորք-Մարաշ վարչական շրջանների ընդհանուր իրավասության դատարանում` դատավոր Գագիկ Պողոսյանի նախագահությամբ է քննվել Վլադիմիր Սիաբանդովի դեմ հարուցված քրեական գործը:

Վերջինիս մեղադրանք է առաջադրված եղել Քյարամ Ավդոյանին դանակի 13 հարավածի միջոցով սպանելու համար:

Դատարանը անմեղսունակ անձին, դատական ակտով, ուղարկեց հարկադիր բուժման, ինչը բուռն բողոքի պատճառ դարձավ սպանվածի հարազատների մոտ: Վերջիններս հենց դատարանի շենքում անեծքներ ու հիշոցներ էին հնչեցնում դատավորի և արդարադատություն իրականացնողների հասցեին:

Սրա վերաբերյալ Դատական դեպարտամենտի մջազգային համագործակցության և հասարակայնության հետ կապերի ծառայության պետ Արսեն Բաբայանը Yerkir.am-ի հետ զրույցում նշեց, որ անձին անմեղսունակ ճանաչելու համար հիմք է ընդունվում դատահոգեբուժական կամ դատահոգեբանական փորձագետի եզրակացությունը: Այսինքն՝ անձին անմեղսունակ ճանաչելու որոշումը թեև ընդունում է դատարանը, սակայն հիմք է ընդունում այլ մասնագիտական եզրակացություն. «Դատարանի նկատմամբ քաղաքացիների դժգոհությունն այս դեպքում անհասկանալի է»: