Ամբողջ գյուղը ծխի մեջ է. հակառակորդը գնդակոծել է Այգեպարը

Ադրբեջանական կողմի գնդակոծության հետեւանքով գիշերը հրդեհ է բռնկվել Տավուշի մարզի սահմանամերձ չեզոք հատվածում, որը մինչև հիմա չի մարել:

Գիշերը`  ժամը 23-ից մինչև մինչև 1-ը, հակառակորդն անկանոն գնդակոծել է սահմանամերձ Այգեպար, Ներքին Կարմիրաղբյուր, Բարեկամավան գյուղերը և զգալի վնասներ պատճառել:

«Ամբողջ գյուղը ծխի մեջ է: Գիշերը լուսաազդանշանային հրթիռ են բաց թողել ու անկանոն գնդակոծել»,- yerkir.am-ի հետ զրույցում ասաց Այգեպարի գյուղապետ Անդրանիկ Այդինյանը: Նրա խոսքով` հրդեհվել է գյուղի տներից մեկը: Հրդեհը  գյուղացիների ջանքերով մարվել է:

Գնդակոծության հետեւանքով վնասվել է գյուղի գազատար խողովակը, որն արդեն վերականգնվել է:

Գյուղապետի խոսքով` ամեն օր գնդակոծության հետեւանքով առնվազն 8 տուն է վնասվում` չհաշված մյուս կորուստները: