Հայկական վարժարանը վերածում են Աթաթուրքի թանգարանի

Թուրքական իշխանությունների ֆինանսավորմամբ վերակառուցվող Կարին (Էրզրում) քաղաքի հայկական վարժարանի պատմական շենքը այսուհետ կօգտագործվի որպես Քեմալ Աթաթուրքի շարժման և Էրզրումի կոնգրեսի թանգարան: Այս մասին հայտնում է «Horizonweekly»-ն:

1881 թվականին կառուցված Սանասարյան վարժարանում 1919 թվականի հունիս-օգոստոս ամիսներին տեղի է ունեցել Էրզրումի կոնգրեսը, որի ընթացքում Թուրքիայի ապագա հանրապետության ստեղծման հիմքն է դրվել (1923): Հանրապետության հռչակումից հետո հայկական կրթօջախի շենքը ծառայել է տարբեր նպատակների՝ 1920-1921 եղել է արվեստի դպրոց, 1922-23-ին՝ լսարան, 1924-ին` նախակրթարան, 1940-ին` Աթաթուրքի անվան արվեստի դպրոց: 1960 թվականից ի վեր իր դռները բացել է որպես Աթաթուրքի և Էրզրումի կոնգրեսի թանգարան, այնուհետև վերածվել է ազգային պալատների վարչության կենտրոնի: Վերանորոգումից հետո այն դարձյալ կօգտագործվի որպես թանգարան:

Էրզրումի փոխնահանգապետ Օմեր Հիլմի Յալմըն տեղեկացրել է, որ շենքի վերականգնման համար ծախսվել է արդեն 5 միլիոն թուրքական լիրա (ավելի քան 2.5 միլիոն դոլար):

Նշենք, որ 1881-1915 թվականներին Սանասարյան վարժարանի շրջանավարտներ են եղել բազում հայ մտավորականներ և հասարակական գործիչներ: