Արգելվել է «Չանախ» պանրի արտադրատեսակի արտադրությունը

Գյուղատնտեսության նախարարության Սննդամթերքի անվտանգության պետական ծառայության պետի հունիսի 23-ի որոշումով արգելվել է «Ալագյազի պանրագործարան» ՓԲԸ-ի «Չանախ» պանրի արտադրատեսակի արտադրությունը:

ՓԲԸ-ում իրականացված ստուգման ընթացքում վերոնշյալ արտադրատեսակի արտադրության փուլում հայտնաբերվել է վտանգավոր սննդամթերքի թողարկում: Ստուգման ընթացքում պարզվել է, որ ՓԲԸ-ի արտադրած «Չանախ» պանրի արտադրատեսակի նմուշը, համաձայն «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ի լաբորատոր փորձաքննության արդյունքների, ԱՑԽՄ ցուցանիշով չի համապատասխանում ՀՀ կառավարության 2006 թ. N 1925-Ն որոշմամբ սահմանված պահանջներին:

Կազմակերպությանը տրվել է հանձնարարական.

1. վերացնել հայտնաբերված խախտումները (կազմակերպել սանիտարական օր, պատշաճ մաքրել և ախտահանել «Չանախ» պանրի արտադրության պահման պահեստային տարածքները, տեխնոլոգիական սարքավորումները և գործիքները):

2. «Չանախ» պանրի պահեստային մասում և իրացման նպատակով իրացման կետերից հետ կանչել, օգտահանել կամ ոչնչացնել մայիսի 5-ի խմբաքանակը:

3. Թողարկել փորձնական արտադրանք և ներկայացնել լաբորատոր փորձաքննության՝ անհամապատասխանության ցուցանիշով:

4. «Չանախ» պանրի արտադրատեսակի արտադրությունը համապատասխանեցնել կառավարության 2006 թ. N 1925-Ն որոշմամբ սահմանված պահանջներին:

Խախտումների վերացման ժամկետ է սահմանվել մինչև հուլիսի 7-ը: Այս մասին հայտնում է Սննդամթերքի անվտանգության պետական ծառայության կայքը: