Վաղը Երևանում ու Գյումրիում երաժշտության տոն կլինի

Հունիսի 21-ին Երևանում և Գյումրիում կնշվի «Երաժշտության տոն» միջոցառումը: Երևանի Պողոսյան պարտեզներում (ժամը 19:00) և Շառլ Ազնավուրի հրապարակում (ժամը 15:00) կենդանի կատարումներով հանդես կգան «Դը Բյութիֆայդ փրոջեքթ» «Դը բենդ» «Դը մանյուսքրիփթ», «Դը ուինդրոզ» խմբերը, ինչպես նաև հեղինակ-կատարողներ:

Երևանի «Հաղթանակ» զբոսայգում կկազմակերպվի էստրադային համերգ»՝ Երևանի էստրադային և ջազային արվեստի պետական քոլեջի սաների և անհատ կատարողների մասնակցությամբ (ժամը 18:00-23:00):

Երևանի Ս. Բարխուդարյանի և Ա. Տեր-Ղևոնդյանի անվան երաժշտական դպրոցների սաները համերգ կտան Ա. Տեր-Ղևոնդյանի անվան երաժշտական դպրոցում (ժամը 17:00):

Գյումրու «Գոհար» երաժշտանոցի դահլիճում տեղի կունենա «Կատուներ» երաժշտաթատերական բեմադրությունը Ալ. Սպենդիարյանի անվան երաժշտական մասնագիտական դպրոցի սաների մասնակցությամբ (ըստ Լ. Վեբերնի «Կատուներ» մյուզիքլի, ժամը 15:00):

Այս միջոցառումները կազմակերպում են ՀՀ մշակույթի նախարարությունը և Հայաստանում Ֆրանսիայի դեսպանությունը:

1982 թ. հունիսի 21-ից Ֆրանսիայի մշակույթի և հաղորդակցության նախարարությունն ամեն տարի անցկացնում է «Երաժշտության տոն» միջոցառումը, որը բացօթյա կենդանի երաժշտության շուրջ է համախմբում պրոֆեսիոնալ և ոչ պրոֆեսիոնալ երաժիշտների և երգիչների:

2007 թ.-ից Հայաստանը Ֆրանսիայի դեսպանության հետ մասնակցում է «Երաժշտության տոնին», իսկ 2009 թ. միջոցառմանը միացել են նաև Հայաստանի մարզերը: Այս մասին հայտնում է մշակույթի նախարարության կայքը: