Մթնոլորտը ոչ թե վտանգավոր, այլ ագրեսիվ էր. հայկական պատվիրակությունն ամփոփեց Բաքվում անցկացրած օրերը

Այսօր լրագրողների հետ զրույցում Բաքու մեկնած հայ պատգամավորներ Կորյուն Նահապետյանը, Թևան Պողոսյանը և քաղաքագետ Ռիչարդ Կիրակոսյանը նշեցին, որ ՆԱՏՕ-ի շրջանակներում անցկացված սեմինարը արդյունավետ է անցել, որովհետև քննարկվել են տարածաշրջանային անվտանգության կարևոր հարցեր, իսկ հայկական պատվիրակությունը արդյունավետ թիմային աշխատանքներով կարողացել է ներկայացնել ազգային շահը:

Թևան Պողոսյանը կարծիք հայտնեց, որ ադրբեջանական մամուլը ապատեղեկատվությամբ էր զբաղված: Նրա խոսքով` թեեւ այս անգամ մի փոքր ազատություն էին տվել հայ պատգամավորներին, բայց նկատելի էր, որ երբ պատգամավորները որևէ տեղ են գնացել, այնտեղ մարդ չի եղել` լինի սրճարան, փողոց, թե ծովափ:

«Պետք չէ հավատալ ադրբեջանական կայքին, մինչև տեղեկությունը չճշտեք հայկական կողմից, որովհետև դա կարող է լինել տեղեկատվական թակարդ, որտեղ ադրբեջանցիները կարող են հաղթանակ տանել»,- ասաց Թևան Պողոսյանը:

Ռիչարդ Կիրակոսյանը ուրախությամբ նշեց, որ հայ պատգամավորները ամենապատրաստված, ակտիվ ու խելացի պատգամավորներն էին այդ սեմինարի մասնակիցների մեջ: «Դժբախտաբար, մթնոլորտը ոչ թե վտանգավոր, այլ ագրեսիվ էր, որովհետև ադրբեջանցիներմ ուզում էին կռիվ տալ, այլ ոչ լսել»,- ասաց քաղաքագետը:

Իսկ Կորյուն Նահապետյանը նշեց, որ իրենք շեշտադրել են այն, որ ԼՂ-ն երբեք չի եղել անկախ Ադրբեջանի կազմում, ԽՍՀՄ փլուզումից հետո ԼՂ ժողովուրդը ինքնորոշվել է` ԼՂ-ն հռչակելով անկախ պետություն: Ադրբեջանցիների շեշտադրումներն էին, որ Ադրբեջանի տարածքները օկուպացված են, որ Հայաստանը ագրեսոր է և այլն:

«Սև քարոզչությունը և հայատյացությունը կազմում են ադրբեջանական պաշտոնական քաղաքականության մի մասը: Նրանք պատրաստակամություն չունեն կառուցողական քննարկման, իսկ մեր մասնակցության կոչը դա էր, և նաև մենք խնդիր ունեինք հստակ ներկայացնել Հայաստանի դիրքորոշումը»,- ասաց Կորյուն Նահապետյանը: