Բաքվում կրքերը չեն հանդարտվում. հայ պատգամավորը Ադրբեջանին կոչ է արել դիպուկահարներին հեռացնել շփման գծից

Բաքվում ընթացող` ՆԱՏՕ-ի Խորհրդարանական վեհաժողովի սեմինարի ընթացքում ԵԱՀԿ Մինսկի խմբի նախկին համանախագահ, Ադրբեջանում ԱՄՆ նախկին դեսպան Մեթյու Բրայզայի ելույթը սկանդալի պատճառ է դարձել: Այդ մասին հայտնում է АПА-ն:

Քննարկման ընթացքում Բրայզան հայտարարել է, որ Ադրբեջանի և Հայաստանի նախագահները դեռևս չեն կարողանում փոխվստահության անհրաժեշտ մակարդակի հասնել՝ ԼՂ հակամարտության կարգավորման և փոխզիջումների հասնելու համար։

Բրայզայի խոսքերով՝ թեեւ ԵԱՀԿ ՄԽ-ն երկար տարիներ ջանքեր է գործադրել հակամարտության կարգավորման ուղղությամբ, խնդիրը դեռևս չի լուծվել։ «Անհրաժեշտ է շարունակել աշխատանքը՝ ԼՂ հակամարտության կարգավորման ռազմական ճանապարհի կիրառումը նվազեցնելու համար»,- ասել է նա` կողմերին կոչ անելով ընդհանուր լեզու գտնել։

Հայկական պատվիրակությունը ողջունել է Բրայզայի ելույթը: Պատվիրակության ղեկավար Կորյուն Նահապետյանն իր ելույթում Ադրբեջանին կոչ է արել դիպուկահարներին հեռացնել շփման գծից։

Ադրբեջանական պատվիրակության անդամ Գուդրաթ Հասանգուլիևը, իր հերթին,  խիստ քննադատել է Բրայզային ու հայերին։ Նա Բրայզային հիշեցրել է, որ հայերը դեմ էին իր դեսպան լինելուն միայն այն պատճառով, որ կինն ազգությամբ թուրք է։

 Թևան Պողոսյանն իր ելույթում  հարց է բարձրացրել Ռամիլ Սաֆարովի մասին: