Թե ո՞նց ենք ապրում, մենք էլ չենք հասկանում. Արսեն Խոջոյանի ընտանիքն օգնության կարիք ունի

Երբ դեռեւս մարտ ամսին հայտնի դարձավ, որ 23-ամյա Արսեն Խոջոյանը գերի է ընկել, իրարանցում բարձրացավ, գերի էին տարել մեր հայրենակցին: Արսենին գերությունից հետ վերադարձրին ապրիլի 10-ին, և հիմա տղայի առողջական վիճակն օր օրի ավելի է վատանում: Բուժման ծախսը, այո, առողջապահության նախարարությունն իր վրա վերցրեց, տրամադրեց բուժման դեղերը, բայց դրանով տղայի ընտանիքի հոգսը չթեթևացավ: Գերությունից վերադարձած տղայի ընտանիքը սոցիալական ծանր վիճակում է ապրում. արդեն վաղուց ԶԼՄ-ները գրել են, որ Արսենը Տավուշում չէ, այլ Գեղարքունիքի մարզում` Սևանում, անասուններ է պահում, որ ընտանիքը կարողանա ապրել: 

Yerkir.am-ի հետ զրույցում Արսենի մայրը` Սվետլանա Խոջոյանը, նշեց, որ մի կերպ են ծայրը ծայրին հասցնում, թե ինչպես են ապրում /Տավուշի մարզի Վերին Կարմիրաղբյուր գյուղում/, իրենք էլ չեն հասկանում:

«Յոթ երեխա ունեմ, բայց միայն ես եմ աշխատում, էն էլ գյուղապետն ա դասավորել` մշակույթի տանը տեխնիկակական աշխատող եմ, 22 000 դրամ եմ ստանում: Յոլա ենք գնում, ճար չկա»,- ասում է տիկին Սվետլանան:

Նա 7 երեխա ունի, որոնցից չորսն անչափահաս են, տղաներից մեկը զինծառայող է, բայց փող գրեթե տուն չի բերում` «չեն թողնում պոստեր բարձրանա, օրենքն է, էլի», իսկ մյուս տղան հաշվառված է` բանակ գնալու համար, սակայն առողջական խնդիրներ ունի, ինչի պատճառով էլ դեռ ձգձգվում է զորակոչը:

«Սրտի հետ կապված խնդիրներ ունի, հեն ա` այսօր էլ են կանչել, բայց դեռ տուն չի եկել, չգիտեմ էլ` ինչ կլինի: Երեխեքից երկուսը դպրոց են գնում: Աղջիկս էլ լավ չի` 12-մատնյա աղիքի հետ կապված խնդիր ունի, ասել են` եթե դեղերը չօգնի, պիտի վիրահատենք: Է, ինչո՞վ վիրահատենք, ինչո՞վ օպերացիայից հետո պահենք: Էն է` մի կով ունեինք, ծախեցինք, որ գա Երևան, պառկի, բուժվի, ճանապարհածախս ա, բան ա»,- ասում է տիկին Սվետլանան:

Ի դեպ, որքան էլ զարմանալի հնչի, ընտանիքն անգամ նպաստ չէր ստանում, միայն վերջերս խոստացել են հարցը լուծել` «վարչապետն անձամբ է հրամայել»:

Տիկին Սվետլանայի ամուսինն էլ ֆիզիկապես ի վիճակի չէ օգնել ընտանիքին, տրակտորով աշխատելիս արկը պայթել է, այժմ առողջական խնդիրներ ունի, վիրահատության ենթակա չէ, քանի որ «վզի տակի ոսկորը շատ ա մոտեցել շնչափողին, բժիշկները վախենում են, որ շնչափողը կծակվի, փաստորեն, հաշմանդամ ա, բայց թոշակ չի ստանում»: Նա այժմ գնացել է Էջմիածին` մի թեթև աշխատանք գտնելու հույսով:

Ընտանիքի հոգսերը սրանով չեն ավարտվում: «Եքա վարկ ունենք գլխներիս: Քամուց տունը փուլ էր եկել գլխներիս, պատուհան, դուռ ջարդվել էր: Արսենն էլ վարկեր էր վերցրել` պատուհանը փոխեց, պատ-մատ շարեց, բայց կիսատ-պռատ մնաց: Չնայած նենց չի, որ գլխներիս տանիք չկա: Հիմա վարկերի տոկոսի ձեռքը չգիտենք` ինչ անել: Վարկերը փակելու համար էլ Արսենը գնացել է Սևան` անասուն պահելու, մի երկու կոպեկ աշխատելու: Եսիմ, է, բժիշկներն ասել են, թե, ոչինչ, պետք չի, որ պառկի Արսենը, կարա աշխատի, բայց վիճակն էն չի»,- ասում է տիկին Սվետլանան` հավելելով, որ տղան Սևանում իրենց ծանոթի տանն է ապրում:

Տիկին Սվետլանայի հավաստմամբ` վերջին շրջանում տղան թույլ էր զգում իրեն, քթից արյուն էր գալիս, ոտքերը, թևերը, մեջքը ցավում են. «Արսենը չխոսկան է դարձել, դե, ես էլ չեմ ուզում հարցեր տամ` ցավը թարմացնեմ, բայց ասում ա` բան էլ չեն սրսկել ինձ ու թեման փակում: Ինքը զադ էլ չի ուտում ըսկի` ախորժակ չունի: Էսքանից հետո, որ ասեմ` լավ ենք ապրում, կհավատա՞ս»:

Ընտանիքն անասուններ էլ չունի` մեկ ոչխար ու մեկ էշ, բայց դրանք, տիկին Սվետլանայի խոսքերով, հեչ, «գոնե կով լինի, կաթ կտա, լի»:

Տիկին Սվետլանան նշեց նաև, որ երբ Արսենը սարերում անասուն պահելիս է եղել, ադրբեջանցիները մի ոչխար են փախցրել. «Տա մերը չէր, ուրիշինն էր, բայց մեր ոչխարը դրա տեղը փոխ տվեցինք: Ի՞նչ անենք, է, չգիտեմ: Գոնե մեծամեծները խառնվեին, մեր վարկը ժամանակավոր կանգնեցնեին` մինչև նորմալ աշխատանք գտնենք, թե չէ` տոկոսի օրերը գլխներիս թուր ա դարձել կախված»…

Հիշեցնենք, որ երեկ Արսեն Խոջոյանին հետազոտել են Հրազդանի բժշկական կենտրոնում: Հետազոտվելուց հետո տղան տեղափոխվել է տուն: Նշանակվել է դեղորայքային բուժում, անհրաժեշտ դեղերը հատկացվել են։ Նա գտնվում է բժիշկների հսկողության ներքո:

Կարինե Հարությունյան