Արսեն Խոջոյանի առողջական վիճակում դրական փոփոխություն կա

Տավուշի մարզի Վերին Կարմիրաղբյուր գյուղի 23-ամյա բնակիչ, Ադրբեջանում գերությունից վերադարձած Արսեն Խոջոյանն այսօր Հրազդանի բժշկական կենտրոնում դարձյալ ենթարկվել է համալիր բուժզննության: Նրան հետազոտել են թերապևտը, նյարդաբանը, նաև Երևանից մեկնած վարակաբանն ու մաշկաբանը:

Առողջապահության նախարարության աշխատակազմի բժշկական օգնության և քաղաքականության վարչության մասնագետները, Խոջոյանին հետազոտած բժիշկ-մասնագետները քննարկել ու վերլուծել են բուժզննության արդյունքները` Արսեն Խոջոյանի առողջական վիճակը գնահատելով բավարար՝ դրական դինամիկայով:

Հաղթահարվել են թուլությունը, մեջքի ցավը, սակայն դեռևս պահպանված է փսորիազի տարրը մաշկի վրա, ինչի դեմ նշանակվել է դեղորայք: Բուժմասնագետներն Արսեն Խոջոյանից վերցրել են արյան նմուշ, որի ուսումնասիրությունից հետո կպարզվի՝ Խոջոյանն ունի՞ բակտերիոլոգիական և ինֆեկցիոն ախտանիշեր, թե՞ ոչ:

Երիտասարդը 15-օրյա ժամկետում դարձյալ կենթարկվի բուժզննության: Անհրաժեշտության դեպքում բուժզննությունը կիրականացվի նաև` ըստ կարիքի ցանկացած ժամանակ:

«Արսեն Խոջոյանի առողջական վիճակը և բուժումը գտնվում են ՀՀ առողջապահության նախարարի անմիջական հսկողության ներքո»,- վստահեցնում է առողջապահության նախարարությունը: