Արսեն Խոջոյանի սթրեսային վիճակը դեռ ամբողջությամբ չի անցել

Ադրբեջանական գերությունից վերադարձած` Տավուշի մարզի Վերին Կարմիրաղբուր գյուղի բնակիչ Արսեն Խոջոյանը մարտի 24-ից գտնվում է բժիշկների խիստ հսկողության տակ:

Ինչպես Yerkir.am-ին հայտնեց Արսենի մայրը` Սվետլանա Խոջոյանը, որդին առողջապահության նախարարության մաշկաբանության և սեռավարակների գիտաբժշկական կենտրոնում ստացիոնար բուժում է անցնում, և շատ հնարավոր է, որ այս շաբաթվա վերջում դուրս գրվի հիվանդանոցից:

«Դե, քանի որ Արսենի մոտ սթրեսային վիճակը դեռ ամբողջությամբ չի անցել, դրա համար էլ պսորիազը հաճախակի կրկնվում է: Հիմա կոնկրետ օր չեմ կարող ասել, բայց երևի այս շաբաթվա վերջին արդեն դուրս կգրվի»,- ասաց մայրը:

Նա նշեց նաև, որ Արսենի վիճակն այս պահին համամատաբար լավ է, սակայն իրենք ապահովագրված չեն նրանից, որ Արսենը կրկին վատ չի զգա իրեն: Ս.Խոջոյանի բնորոշմամբ՝ իր որդին ծանր սթրեսի պատճառով է հայտնվել այդ վիճակում: