Լինելու է շատ խիստ մոտեցում` հղիների մահերի հետ կապված. նախարարը` Գյումրիում գրանցված դեպքի մասին

Այսօր լրագրողների հետ զրույցում առողջապահության նախարար Արմեն Մուրադյանն անդրադարձել է երեկ Գյումրիում գրանցված միջադեպին, երբ ծննդաբերության ժամանակ 38-ամյա կին է մահացել: Նա նշեց, որ դեպքից անմիջապես հետո առողջապահության նախարարությունում ձևավորվել է խումբ` գլխավոր գինեկոլոգ-մանկաբարձ, պրոֆեսոր Աբրահամյանի գլխավորությամբ, որը մեկնել է Գյումրի` ուսումնասիրելու բոլոր փաստերը:

«Վերջնական բոլոր նյութերը քննարկվելու են առողջապահության նախարարությունում` հատուկ նիստում, լինելու է շատ խիստ մոտեցում` մայրական մահերի հետ կապված»,- ասաց նախարարը:

Նա նշեց, որ առողջապահության նախարարության ուաշդրության կենտրոնում է գտնվում նաև երկու այլ դեպք` կապված Գյումրիում երկու կանանց ծննդաբերությունից հետո առաջացած բարդությունների հետ: Նախարարը նշեց, որ կանացից մեկն արդեն վիրահատվել է, երկուսն էլ տեղափոխվել են Երևան:

Ինչ վերաբերում է Գյումրիում ծննդաբերության ժամանակ մահացած կնոջ դեպքին, թե ո՞րն է մահվան պատճառը, նախարարը նշեց, որ վերջնական պատճառը կարող են պարզել դատական մարմինները, նախնական տվյալների համաձայն` պատճառը պտղաջրային էմբոլիա կոչվող հազվադեպ հանդիպող բարդությունն է, որը կայծակնային ավարտ է ունենում:

Հիշեցնենք, որ ծննդաբերության ժամանակ առաջացած բարդության հետեւանքով մայիսի 28-ին Գյումրու «Մոր և մանկան» ավստրիական հիվանդանոցի ծննդաբերական բաժանմունքում մահացել է Կարինե Պապանյանը։