ՌԴ միգրացիոն նոր քաղաքականությունը չպետք է վատ դիտարկել. փոխարտգործնախարար

Այսօր լրագրողների հետ զրույցում ՀՀ արտգործնախարարի տեղակալ Սերգեյ Մանասարյանն անդրադարձել է Ռուսաստանի միգրացիոն օրենսդրության այն նոր փոփոխություններին, որոնք հեշտացնում են ՌԴ քաղաքացիություն ստանալը նախկին ԱՊՀ երկրների քաղաքացիների համար:

Նա նշեց, որ այդ փոփոխությունները պետք չէ դիտարկել որպես հակահայկական կամ հակամիգրացիոն, որովհետև այդ փոփոխության հիմնական նպատակն է անօրինական միգրացիան ստվերից հանելը:

Ինչ վերաբերում է այն քաղաքացիներին, որոնց Ռուսաստանից հետ են վերադարձնում առանց լուրջ պատճառաբանության, Սերգեյ Մանասարյանը նշեց, որ 2-3 օր առաջ արտաքին գործերի նախարարությունը ստացել է պաշտոնական հայտագիր Ռուսաստանի դեսպանությունից, որում ֆիքսված է հետևյալ գաղափարը, որ բազմաթիվ մարդիկ մերժում են ստացել Ռուսաստանի սահմանահատում իրականացնելու համար` ունենալով շատ չնչին տեխնիկական բնույթի խախտումներ:

Փոխարտգործնախարարը նշեց, որ բոլոր դեպքերում ՌԴ-ն խորհուրդ է տալիս քաղաքացիներին՝ դիմել կա'մ միգրացիոն ծառայություն՝ ուղիղ, կա'մ դեսպանության միջոցով, և իրենք պարտավորվում են այդ արգելքը հանել բավական արագ: «Վերջերս մենք բազմաթիվ դեպքեր ենք ունեցել, երբ մեր միջոցով են քաղաքացիները դիմել, և արգելքը հանվել է: Այսինքն՝ իրենք էլ են գիտակցում, որ չի կարելի, ասենք, կարմիր լույսի տակ անցնելու պարագայում տուգանք ստանալու պատճառով մերժվել ՌԴ տարածքում գտնվել»,- ասաց նա: