Տիեզերական արբանյակի ստեղծման ծրագրի շրջանակներում Բեգլարյանը ԱՄՆ կմեկնի

Կառավարությունում լուրջ են կպել Հայաստանի' տիեզերքում սեփական արհեստական արբանյակն ունենալու գաղափարին: Ընդ որում` կառավարության ծրագրում էր տեղ գտել այդ  «հավակնոտ» նախագիծը, եւ արդեն այսօր կառավարությունը ձեռնամուխ է լինում իր այդ դրույթը իրագործելու աշխատանքին:

Վարչապետ Հովիկ Աբրահամյանը մայիսի 27-ին հրամանագիր է ստորագրել, որով տրանսպորտի և կապի նախարար Գագիկ Բեգլարյանին, նախարարության աշխատակազմի ղեկավար Գագիկ Գրիգորյանին և նախարարության աշխատակազմի արտաքին կապերի և ծրագրերի վարչության պետի պաշտոնակատար Աշխեն Մկրտչյանին 2014 թվականի հունիսի 2-6-ը գործուղում է ԱՄՆ' Հոթորն, Հայաստանի Հանրապետության տիեզերական արբանյակի ստեղծման ծրագրի շրջանակներում «ՍպեյսԻքս» ընկերության տնօրինության հետ հանդիպում ունենալու համար:

Այսինքն' եթե Գագիկ Բեգլարյանի գործուղումը հաջող անցնի, Հայաստանի արբանյակներն էլ Շուրիկի արկածների մասին ֆիլմից հայտնի խոսքերի պես կսկսեն «бороздить космические пространства» (ճանապարհ հարթել տիեզերքում):