Ռուսախոս օտարերկրացիները ՌԴ քաղաքացիություն կստանան. Պուտինը ստորագրեց օրենքը

ՌԴ նախագահ Վլադիմիր Պուտինը ստորագրել է հեշտացված կարգով ՌԴ քաղաքացիություն ստանալու մասին օրենքը: Այդ մասին հայտնում է Կրեմլի մամուլի ծառայությունը: 

Հիշեցնենք, որ օրինագիծն ավելի վաղ 1-ին, 2-րդ և 3-րդ ընթերցմամբ ընդունել էր  ՌԴ Պետդուման: Իսկ ապրիլի 16-ին այն հավանության արժանացրեց նաև ՌԴ Դաշնային խորհուրդը:

Օրինագիծը, որն առաջարկել էր ՌԴ Միգրացիոն ծառայությունը, ենթադրում է, որ այն օտարերկրացիները կամ նրանց հարազատները, ովքեր բնակվում են կամ բնակվել են ՌԴ տարածքում կամ նախկին ԽՍՀՄ-ում և Ռուսական կայսրության տարածքում (ժամանակակից Ռուսաստանի սահմաններում), վարժ տիրապետում են ռուսերենին, կկարողանան հեշտացված կարգով ՌԴ քաղաքացիություն ստանալ 3 ամսվա ընթացքում: Կստեղծվի հատուկ հանձնաժողով, որը հարցազրույցի միջոցով կստուգի օտարերկրացիների ռուսերենի իմացությունը: Անհրաժեշտ է, որպեսզի նրանք վարժ տիրապետեն ռուսերենին և օգտագործեն այն առօրյայում: Պարտադիր պայմանը այլ պետության քաղաքացիությունից հրաժարվելն է: ՌԴ քաղաքացիություն ստանալ ցանկացող անձը պետք է բնակվի Ռուսաստանում: