Տիգրան Սարգսյանի դեպքում հանցակազմի նշաններ չկան

ԱԺ ՀՀԿ-ական պատգամավորներից որևէ մեկի` կառավարությունում պաշտոն ստանալուց հետո ՀՀԿ ցուցակով պատգամավոր է դառնալու ՀՀԿ-ական  Լեռնիկ Ալեքսանյանը: Այսօր լրագրողների հետ հանդիպման ժամանակ նա նշեց, որ ինքը չորս անգամ պատգամավոր է ընտրվել և ունի  ցանկություն ԱԺ-ում աշխատելու:

«Ես պատկերացնում եմ` պատգամավոր  լինելու դեպքում ավելի շատ գործել, քիչ խոսել, աշխատել հանձնաժողովներում և խորհրդարանի ամբիոնը օգտագործել քննարկումների համար, այլ ոչ թե ավելորդ տեղը պոպուլիստական քաղաքական հարցեր հնչեցնելու համար»,- ասաց նա:

Խոսելով նոր վարչապետի մասին` Ալեքսանյանը նշեց, որ Հովիկ Աբրահամյանը շատ ընդունելի թեկնածու է այդ պաշտոնում, քանի որ ունի  կազմակերպչական ջիղ, աշխատանքի փորձ, հեռատեսություն: Նա նշեց, որ Հովիկ Աբրահամյանի հետ աշխատել են միասին Արարատի մարզում, և նա այն անձնավորությունն է, ով  ունի բոլոր հնարավորությունները` եղած  թերությունները  շտկելու համար:

Լեռնիկ Ալեքսանյանի խոսքով` նոր կառավարության ծրագրերը պետք է լինեն նախորդի շարունակությունն այն պատճառով, որ նախորդ կառավարության ծրագրի հիմքում էլ ընկած է եղել նախագահի նախընտրական ծրագիրը:

«Տիգրան Սարգսյանն  աշխատում էր, Հանրապետական կուսակցությունն այն կարծիքին չէ, որ ինքը լավ չի աշխատել: Չի կարելի բոլոր թերությունները բարդել նախկին կառավարության վրա,  պարզապես նա վրիպումներ է ունեցել»,- ասաց նա:

Yerkir.am-ի հարցին` ինչո՞ւ Տիգրան Սարգսյանն իր  վրիպումների համար պատասխանատվության չի ենթարկվում, դեռ մի բան էլ նրան նախագահը շնորհակալություն է հայտնում, Լեռնիկ Ալեքսանյանը պատասխանեց, որ մարդուն պատասխանատվության ենթարկելու համար պետք է առկա լինի քրեական հանցակազմ, ինչը Տիգրան Սարգսյանի դեպքում չկա: Նրա կարծիքով` Տիգրան Սարգսյանը աշխատել է, լավ բաներ է արել, օրինակ` բանկային համակարգի զարգացումը: