Գերմանիայում Արցախի պատվիրակությանը ջերմ են ընդունել

ԼՂՀ ազգային ժողովի նախագահ Աշոտ Ղուլյանն այսօր հրավիրած մամուլի ասուլիսի ժամանակ ներկայացրել է Արցախի պատվիրակության վերջերս Գերմանիա կատարած այցի մանրամասները։

Աշոտ Ղուլյանի գլխավորած պատվիրակությունը, որի կազմում էին նաեւ արտաքին գործերի փոխնախարար Ֆելիքս Խաչատրյանը եւ ԳԴՀ-ում ԼՂՀ մշտական ներկայացուցիչ Հարություն Գրիգորյանը, մասնակցել են Բեռլինի Եվրոպական ակադեմիայում կազմակերպված`«Լեռնային Ղարաբաղի դերն ու նշանակությունը Հարավային Կովկասի զարգացման գործում» խորագրով միջոցառմանը: Պատվիրակությունը  նաեւ  արդյունավետ  հանդիպումներ է ունեցել, որոնց ընթացքում գերմանացի գործընկերների հետ ձեռք են բերվել մի շարք պայմանավորվածություններ, որոնց մասին Աշոտ Ղուլյանը խոստացավ տեղեկացնել ավելի ուշ: Տպավորիչ է եղել հատկապես Պոտսդամում գտնվող` Յոհան Լեփսիուսի տուն-թանգարանում տեղի ունեցած հանդիպումը, որ  ժամանակ պայմանավորվածություն է ձեռք բերվել աշնանը Արցախի պետհամալսարանում Ցեղասպանության 100-ամյա տարելիցին նվիրված համատեղ միջոցառում կազմակերպել։

ԱԺ նախագահը նշել է, որ հանդիպումների ժամանակ զգացել է գերմանացի գործընկերների՝ արցախցի խորհրդարանականների հետ հարաբերությունների ակտիվացման պատրաստակամությունը` կարևորելով  Գերմանիայում գործող հայկական կազմակերպությունների, առաջին հերթին` Բեռլինում ԳԴՀ-ում Հայաստանի  դեսպանատան և հատկապես`  ՀՀ արտակարգ և լիազոր դեսպան Վահան Հովհաննիսյանի աջակցությունը: