Ծառուկյանը պատրաստ է հանդիպել

Գագիկ Ծառուկյանի կողմից որևէ խնդիր չկա` չորս քաղաքական ուժերի առաջնորդների միջև հանդիպման հետ կապված, բայց այս պահին նման տեղեկատվություն դեռ չկա: Այս մասին Yerkir.am-ի հետ զրույցում ասաց ԲՀԿ առաջնորդ Գագիկ Ծառուկյանի մամուլի խոսնակ Իվետա Տոնոյանը` պատասխանելով հարցին` արդյոք առաջիկայում նախատեսվա՞ծ է հանդիպում ոչ իշխանական չորս ուժերի առաջնորդների միջև:

Նա նշեց, որ Գագիկ Ծառուկյանը հանդիպման վերաբերյալ իր պատրաստակամության մասին հայտնել է նաև «Ժառանգության» առաջնորդ Րաֆֆի Հովհաննիսյանի հետ հանդիպման ժամանակ: «Պարոն Ծառուկյանն ասել է, որ կարող են որոշել օրը, ժամը, և ինքը պատրաստ է տրամադրել, քառյակի հանդիպման հետ կապված, բոլորի համար ընդունելի պայմանները»,- ասաց Իվետա Տոնոյանը:

Նշենք, որ այսօր «Ժառանգություն» կուսակցությունը հայտարարություն էր տարածել այն մասին, որ կուսակցությունը խորհրդարանական չորս խմբակցությունների մաս կազմող ուժերի հետագա համագործակցության անհրաժեշտ պայման է  դիտարկում չորս ուժերի առաջնորդների միջև հանդիպումը: