Ես դեռ չգիտեմ՝ ինչ կլինի. Աշոտ Ղահրամանյան

«Վարչապետի հրաժարականն իմ կոմպետենցիայի մեջ չի մտնում, ես այդ հարցերի հետ առնչություն չունեմ»,- Yerkir.am-ին այսօր ասաց Արմավիրի մարզպետ Աշոտ Ղահրամանյանը` լսելով վարչապետի հրաժարականի առնչությամբ մեր հարցը:

Yerkir.am-ի դիտարկմանը, թե` Դուք չեք առնչվում վարչապետի հրաժարականի հետ, բայց դրա հետեւանքների հետ առնչվելու եք, մարզպետը պատասխանեց, որ նոր կառավարության ձեւավորման հարցերը երկրի նախագահի, ԱԺ-ի եւ կուսակցությունների որոշելու խնդիրն է: Մեր դիտարկմանը, թե մարզպետն էլ է կուսակցական, իրենց մոտ դեռ չե՞ն քննարկվել նման հարցեր, Աշոտ Ղահրամանյանն արձագանքեց. «Ես դեռ չգիտեմ` ինչ կլինի: Նման հարց` նոր կառավարության ձեւավորման հարց, մեզ մոտ չի քննարկվել: Երբ որ կքննարկվի, ամեն ինչ կորոշվի, այն ժամանակ կիմանաք: Ես չեմ կարող պատասխանել նման հարցերի, թե ինչպիսին կլինի նոր կառավարությունը»:

Հարցին` իսկ Դուք ի՞նչ եք ակնկալում` նոր կառավարության ձեւավորումից հետո կշարունակե՞ք, որպես մարզպետ, Ձեր պաշտոնավարումը, մարզպետը պատասխանեց, որ ինքը ներկա դրությամբ շարունակում է կատարել իր պարտականությունները, զբաղվել իր ամենօրյա գործերով, խնդիրների լուծմամբ, ու ամեն ինչ վերջնականապես պարզ կլինի, երբ կազմավորվի նոր կառավարությունը:

Աշոտ Ղահրամանյանը խուսափեց նաեւ պատասխանել հարցին` իր համար սպասելի՞, թե՞ անակնկալ էր կառավարության ղեկավարի հրաժարականը: