Թալանում եք երիտասարդներին. ՍԴ-ի շենքի մոտ հավաքվածները` ՀՀԿ-ական պատգամավորին

Սահմանադրական դատարանի առջև հավաքված` «Դեմ եմ» նախաձեռնության անդամներն ու կուտակային կենսաթոշակային համակարգին դեմ քաղաքացիները ակնկալում են, որ ՍԴ-ն պետք է անկողմնակալ որոշում կայացնի:

Yerkir.am-ի թղթակիցը հաղորդում է, որ ԱԺ ՀՅԴ խմբակցության պատգամավոր Արծվիկ Մինասյանը, դուրս գալով ՍԴ դահլիճից, հայտնել է, որ համոզված է` պատասխանող կողմը չի կարող ուժեղ հակափաստարկներ բերել` ի պատասխան դիմողների ներկայացրած` բավական ծանրակշիռ փաստարկների:

Ուշագրավ միջադեպ է տեղի ունեցել, երբ նիստի ընդմիջումից հետո ՍԴ շենքից դուրս է եկել պատասխանող կողմի ներկայացուցիչ, ԱԺ պատգամավոր Հակոբ Հակոբյանը: Հավաքվածները նրան ասել են, որ պայքարում են իրենց երեխաների բարեկեցության համար, իսկ նրանք փորձում են թալանել երիտասարդներին:

Ի պատասխան` պատգամավորն ասել է, թե ի՞նչ տարբերություն` վճարում են եկամտային հա՞րկ, թե՞ պարտադիր կուտակային վճար: Այս պատասխանը բավական կոշտ է ընդունվել հավաքվածների կողմից: