Բարոզուն է ինձ խորհուրդ տվել լքել Վրաստանը. Սահակաշվիլի

ԱՄՆ-ում բնակություն հաստատած` Վրաստանի նախկին նախագահ Միխեիլ Սահակաշվիլին հայտարարել է, որ իրեն Վրաստանը լքելու խորհուրդ է տվել Եվրահանձնաժողովի նախագահ Ժոզե Մանուել Բարոզուն: Այդ մասին նա ասել է «Ռուսթավի 2»-ի եթերում:

Սահակաշվիլին պատմել է, որ անցած տարվա նոյեմբերին, Բրյուսելի նախաձեռնությամբ, կատարել է երկու այց, մեկը՝ Եվրոպական խորհրդի նախագահ Հերման վան Ռոմպույի, մյուսը՝ Բարոզուի մոտ:

«Բարոզուն ինձ ասաց, որ հենց կառավարությունը ձերբակալի ինձ, ոչ ոք իրեն չի համոզի, որ դա Պուտինի կողմից վերահսկվող կառավարություն չէ: Այդ պատճառով դու պետք է հասկանաս՝ ո՞րն է քո դերը... Դու կարող ես մնալ Վրաստանում և հայտնվել բանտում, մենք էլ կլվանանք մեր ձեռքերը, և փաստացի կհանձնենք Վրաստանը Պուտինին»,- պատմել է Սահակաշվիլին: