Զանգի վարչապետին. գյուղացիները` մարզպետին

Արագածոտնի մարզի շուրջ 7 գյուղերի բնակիչներ շարունակում են պայքարել Կարբի ձորում կառուցվող նոր ՀԷԿ-ի դեմ: Նրանք պնդում են, որ ՀԷԿ-ի կառուցման դեպքում կառաջանա ոռոգման ջրի խնդիր:

Երեւան-Աշտարակ մայրուղու վրա քարեր շարած բնակիչների հետ փորձում է բանակցություններ վարել Արագածոտնի մարզպետ Սարգիս Սահակյանը: Սակայն նրան բնակիչները, կարծես, չեն էլ ուզում տեսնել:

Գյուղացիները պահանջում են վարչապետին: Նրանք նաեւ հայտարարում են, թե Սերժ Սարգսյանը հրահանգել է դադարեցնել ՀԷԿ-ի շինարարությունը, բայց դա չի արվում: Գյուղացիների մեջ մոլորված մարզպետն անզորությունից ոչինչ չի կարողանում անել: Բնակիչները պահանջում են զանգահարել վարչապետին:

Մարզպետի բացատրություններին գյուղացիները բացականչություններով են արձագանքում եւ հասկացնում, որ իրենց դա չի հետաքրքրում: Գյուղացիները հայտարարում են, որ 95 տոկոսով ձայն են տվել Սերժ Սարգսյանին, բայց այսօր իրենց լսող չկա: