Մեր ժամանակ ոչ ոք ավտոմեքենայով չի եղել, ոտքով քայլել ենք 25-30 կիլոմետր. ՀՀԿ-ական պատգամավորը` իր Վերջին զանգի մասին

ԱԺ ՀՀԿ խմբակցության քարտուղար,  10-ի Բ դասարանի երբեմնի աշակերտ Գագիկ Մելիքյանը բազմաթիվ հիշարժան պահեր ունի` իր Վերջին զանգի հետ կապված:

«Ամբողջ դասարանով  ողջ գիշերը անցկացրել ենք միասին` Տավուշի անտառներից մեկում, դիմավորել ենք արևածագը, երջանկություն մաղթել մեկս մյուսին»,- ասաց Գագիկ Մելիքյանը` հավելելով, որ իր դասընկերների մեծ մասը հաջողությունների են հասել իրենց մասնագիտական ոլորտներում:

«Ես ուղղակի հիացած եմ մեր դասարանով ու իմ դասընկերներով»,- ասաց ՀՀԿ-ական պատգամավորը`հավելելով, որ մեծ կարոտ կա ուսուցիչների հանդեպ, և ամեն տարի Վերջին զանգի օրը զանգահարում է իր ուսուցիչներին` հայտնելով շնորհակալություն:

Պատգամավորը նշեց, որ հաճախակի է այցելում այն դպրոցը, որտեղ սովորել է, իսկ վերջին անգամ այնտեղ եղել է 18 օր առաջ:

Հարցին, թե արդյո՞ք այն ժամանակ էլ ավարտական դասարանների աշակերտները ձգտում էին Վերջին զանգի օրը մեքենաներով շրջել, Գագիկ Մելիքյանը պատասխանեց. «Մեր ժամանակ այդպիսի բաներ չեն եղել` ընդհանրապես: Որևէ մեկն ավտոմեքենայով չի եղել, բոլորս ոտքով քայլել ենք մոտ 25-30 կիլոմետր: Քեֆ արեցինք մինչև լույս, հարբեցինք էլ»:

Հավելենք, որ մեկ օրվա ընթացքում` Վերջին զանգի օրը, միայն Երևանում տուգանային հրապարակ է տարվել 113 մեքենա, քանի որ դրանց ղեկին եղել են դպրոցների շրջանավարտներ: