Հայաստանից ապաստան խնդրած Ջավիդի մայրը հաստատել է, որ որդու կինը հայկական արմատներ ունի

Ադրբեջանական իշխանական АПА գործակալությունն անդրադարձել է Հայաստանից ապաստան խնդրած ադրբեջանցի ընտանիքին:

Զրուցելով Հայաստանում կնոջ և երեք երեխաների հետ ապաստանած Ադրբեջանի քաղաքացի Ջավիդ Օրուջևի մոր հետ` կայքը պարզել է, որ «Ջավիդը երբեք ոչ մի տեղ չի աշխատել, նա միշտ ուրիշի հաշվին է ապրել»: Ըստ ադրբեջանական պարբերականի՝ մայրը քննադատել է որդու քայլը: Նա պատմել է, որ որդին երկու անգամ է ամուսնացել, նրա երկրորդ կինը Ռոյա Միրզոևան է, ով հայկական արմատներ ունի:

Մոր խոսքերով` տղան մոտ 3 ամիս պահակային ծառայությունում է աշխատել, սակայն հետո մնացել է առանց աշխատանքի: «2001-2003-ը նա ապրել է Ռուսաստանում, 2010-ին մեկնել է Նորվեգիա և փորձել այնտեղ մշտական բնակություն հաստատել, սակայն չի հաջողվել: 2013-ին վեադարձել է Բաքու: Վերադառնալուց հետո դիմել է Ադրբեջանում Գերմանիայի և Իսրայելի դեսպանատներ, սակայն` ապարդյուն»,- պատմել է կինը:

Օրուջևի մոր խոսքերով՝ հնարավոր է` որդուն խորհուրդ են տվել Հայաստանը որպես երրորդ երկիր օգտագործել` Եվրոպա արտագաղթելու համար: